Draghi paraqiti dorëheqjen e tij sot në mëngjes, pas rënies së koalicionit të tij të gjerë pasi tri parti kyçe bojkotuan votëbesimin vendimtar për udhëheqjen e tij
Presidenti i Italisë Sergio Mattarella shpërndau parlamentin dhe shpalli zgjedhje të parakohshme, duke pranuar fundin e qeverisë së udhëhequr nga kryeministri Mario Draghi, raporton Anadolu Agency (AA).
Draghi paraqiti dorëheqjen e tij sot në mëngjes, pas rënies së koalicionit të tij të gjerë pasi tri parti kyçe bojkotuan votëbesimin vendimtar për udhëheqjen e tij.
Në një fjalim të shkurtër pas takimit me kryetarët e dhomës së ulët dhe Senatit, Mattarella tha se shpërbërja e parlamentit ishte “zgjedhja e fundit e mundshme”, por u bë “e pashmangshme” në vazhdën e situatës politike.
Presidenti i ka kërkuar Draghit të qëndrojë në detyrë deri në formimin e një qeverie të re.
Asnjë datë nuk është caktuar për zgjedhje të reja, por ato mund të mbahen nga fundi i shtatorit deri në fillim të tetorit.
Mattarella theksoi se Italia po përballet me një sërë zgjedhjesh të vështira dhe angazhime urgjente që kërkojnë veprim të shpejtë të parlamentit.
Presidenti u kujtoi forcave politike sfidat me të cilat përballen familjet dhe bizneset italiane, veçanërisht inflacioni i lartë, rritja e çmimeve të energjisë dhe ushqimeve dhe efektet e luftës në Ukrainë.
Ai theksoi nevojën për të zbatuar masat e nevojshme për mbështetje nga Fondi Evropian i Rimëkëmbjes.
Megjithëse Draghi fitoi votëbesimin në parlament të mërkurën, ai ishte pa mbështetjen e partive kryesore në koalicionin e tij të gjerë.
Gjatë një debati të ashpër në Senat, u bë e qartë se partia Liga e krahut të djathtë dhe Forza Italia e Silvio Berlusconit nuk ishin të prirura të qëndronin në qeveri me Lëvizjen 5-Yje që shkaktoi krizën. Të tri partitë nuk pranuan të marrin pjesë në votim.
