Vrasjen e policit Muhamed Lika natën e kaluar në Kaçanik dyshohet se e kryen dy persona. Tani për tani nuk është arrestuar asnjëri, konfirmoi Prokuroria Themelore në Ferizaj në konferencën për media pasditen e sotme
Kryeprokurori i Prokurorisë Themelore në Ferizaj, Burim Çerkini, tha se persona të panjohur e vranë rreshterin Muhamed Lika.
“I njëjti ka qenë duke u kthyer nga puna dhe në momentin e hyrjes në banesë e në shkallët e ndërtesës nga persona të panjohur është qëlluar dhe nga plagët vdekjeprurëse ka ndërruar jetë. Nga provat materiale shihet që aktin e kanë kryer dy persona që për momentin largohen nga vendi i ngjarjes. Policia e Kosovës është duke bërë një punë të jashtëzakonshme në gjetjen dhe kapjen e autorëve të kësaj vrasjeje. Jemi duke marrë të gjitha veprimet hetimore për të zbuluar arsyen dhe motivet për këtë vrasje të rëndë. Gjatë natës së kaluar dhe gjatë ditës së sotme janë intervistuar shume persona, dëshmitarë, persona që kanë rastisur në vendin e ngjarjes, që do të na shpiejnë në zbardhjen e kësaj çështjeje. Vrasja e pjesëtatit të Policisë është një rast që ka tromditur mbarë opinionin, duke marr parasysh se i njëjti ishte duke u kthyer nga puna e i cili në këtë shërbim ka dhënë një kontribut në mbrojtjen e vlerave qytetare dhe sigurisë së përgjithshme. Kanë rrjedhur informata për arrestimin e personave të ndryshëm. Mund t’ju them se deri me tani nuk kemi persona të arrestuar për këtë çështje penale”, tha prokurori Çerkini.
