Prokuroria nuk ka nisur hetime formale, por e ka autorizuar Policinë që të grumbullojë dhe verifikojë informacionet e pranuara rreth dyshimeve për votimin me postë. Kështu tha Prokuroria Themelore në Prishtinë në një përgjigje për Gazetën Express. Nga ky institucion nuk kanë treguar nëse kanë intervistuar dikë.
Prokuroria Themelore në Prishtinë ka thënë se nuk kanë nisur hetimet formale për cështjen e votave me postë, por kanë autorizuar Policinë e Kosovës që të grumbullojë dhe verifikojë informacionet e pranuara.
Në një përgjigje për Gazetën Express Prokuroria ka thënë se nuk mund të tregojë nëse ka pasur intervistime.
“Ju njoftojmë, se Prokuroria Themelore në Prishtinë, nuk ka filluar hetimet formale, por ka autorizuar Policinë e Kosovës në grumbullim dhe verifikim të informacioneve që është pranuar lidhur me dyshimet rreth procesit të votimit me postë dhe se aktualisht janë duke ndërmarrë veprime sipas autorizimit. Sa i përket intervistimit të ndonjë personi, kjo çështje (informacion) nuk mund të ndahet në këtë fazë të procedurës po ashtu nuk mund të ndajmë detaje të hollësishme për shkak të moscenimit të hetimeve”, thuhet në përgjigje.
Po ashtu, Prokuroria nuk i është përgjigjur interesimit të redaksisë për të kuptuar se hetimet a janë duke u zhvilluar në kuadër të deklaratave të LDK’së, VV’së apo të të dyjave.
VV e LDK me akuza të ndërsjella
Pasi LDK mori 30.21 për qind të votave, apo rreth 19 mijë vota, nga votimi në postë, Vetëvendosje kishte kërkuar anulim të këtyre votave. VV e ka akuzuar LDK’në për “vjedhje industriale”.
Për këtë, VV ishte ankuar në PZAP, e më pas edhe në Supreme. Të dy këto institucione e kanë refuzuar ankesën e partisë në pushtet.
LDK e kishte përshëndetur vendimin e Supremes duke thënë se VV synonte përmbysjen e vullnetit qytetar.
Pas refuzimit të Supremes, VV të enjten e kaluar u ankua në Gjykatën Kushtetuese.
Në një komunikatë për media, LVV ka sulmuar Gjykatën Supreme duke thënë se vendimi i tyre është i ndikuar politikisht dhe është vendim absurd.
“Konsiderojmë se është detyrë e të gjithëve dhe veçanërisht e inistutcioneve të thirrura që të ruajnë vullnetin e shprehur të qytetarëve në procesin zgjedhor, vullnet nga i cili buron legjitimiteti i secilit institucion të Republikës. Kësisoj, vetëm një vendim i drejtë i Gjykatës Kushtetuese do të ishte siguresë e ndalimit të deformimi të tillë”, thuhej në reagim.
Ndërsa në anën tjetër, deputeti Besian Mustafa, ka publikuar një video dhe ka thënë se VV ka manipuluar me votat e mërgatës.
“Manipulimi i VV i votave të mërgatës: një dorë, një laps i mbushë dhjetëra fletvotime të mërgimtarëve. Hajnia e votës me shpejtësinë e vajit në tepsi”, kishte shkruar ai më 19 mars.
Bisedat në kryesinë e LDK’së shpërfaqën përplasje
Anëtarë të kryesisë së LDK’së kanë pasur disa akuza lidhur me votimin me postë. Ish-kryeministri Avdullah Hoti, kërkon që “grupi i Kryesisë së LDK-së që ka punuar me diasporë” të tregonte se çfarë po ndodhte me votat e kandidatëve, në të cilat ai tha se ishin evidentuar disa “parregullsi” dhe mospërputhje të “çuditshme”.
Kryetari i LDK-së, Lumir Abdixhiku, i ishte përgjigjur Avdullah Hotit po atë ditë kur ai e kishte ngritur shqetësimin lidhur me votat me postë, duke thënë se çështjet e tjera përveç numrit të mandateve që do t’i fitonte partia, ishin “lluks momental”.
“Në fakt jam i brengosur për nënperformacën e degëve nga realizimi i votave të regjistruara në vota aktuale për partinë. I kemi pasë të raportuara 40 mijë regjistrime, e po na realizohen gjysma e tyre në vota. Për këtë do të duhet të kishim brengë! Ju lus që të na kurseni nga ironitë”, shtonte ai.
“Çështjet tjera të evidentuara, ju lus t’i adresoni në organet kompetente, nga Policia tek Prokuroria. Ruajeni partine aq sa mundeni. Për të tjerat mbrojeni veten” kishte shkruar Abdixhiku.
Edhe ish-shefi i grupit parlamentar të LDK-së po këmbëngulte atë ditë se kishte pasur vjedhje të votave brenda listës dhe insistonte që skemës, që sipas tij u orkestrua nga disa bashkëpartiakë, t’i vihet emri “skemë e organizuar kriminale”.
“Faktet po ulërasin o Kujtim. Ti duhet me u pajtu me shqetësimin, për krimin qe ka ndodhë”, kishte shkruar Arben Gashi, duke i replikuar, siç vërehej, nënkryetarit të partisë, Kujtim Shala, i cili ia kthente më pas: “Asnjë manipulim nuk është i tolerueshëm”.
“Kujtim, qitja emrin, nuk është manipulim, është skemë e organizuar kriminale. Pa e identifiku sakt problemin nuk mundemi me e shpëtu partinë”, këmbëngulte sërish Gashi.
“Ok dajë, e indentifikojmë dhe e adresojmë si duhet. Jemi ne, por ka edhe institucione që merren me gjërat e tilla”, ia kthente Shala. “Ok”, i përgjigjej Gashi në një diskutim që dukej i mbyllur.
Për votat me postë ishte ankuar edhe Shkëmb Manaj, në një grup me bashkëpartiakë në ËhatsApp. Mesazhin e tij e kishte publikuar më herët Reporteri dhe ai shkruante kështu: “Është proces i manipuluar përmes skemave kriminale, në të cilin fatkeqësisht janë përfshirë edhe kolegë tanë të listës kandiduese, të cilët janë edhe anëtarë të Kryesisë Qendrore të LDK-së”.
“Manipulimi i votave të kandidatëve është evident, edhe fëmijët po i vërejnë”, kishte shkruar Manaj, i cili nuk ka arritur të marrë mjaftueshëm vota për t’u bërë deputet.
Abdixhiku shkroi të hënën në Facebook se “sulmet e sinkronizuara ndaj LDK-së, të nisura që nga përfundimi i zgjedhjeve, nuk janë as të rastësishme e as të paqëllimshme”. Ato, ai tha se “rikulmuan” në “sinkron”.
