Nacionalistët radikalë çekë së bashku me partitë e tjera joparlamentare margjinale arritën të mbledhin 70 mijë qytetarë në sheshin Wenceslas në Pragë për demonstrata kundër qeverisë çeke, Bashkimit Evropian, NATO-s, OKB-së dhe për neutralitetin ushtarak të Republikës Çeke dhe kthesën politike drejt Rusisë, nga e cila presin që të sigurojë gaz të lirë.
“Qëllimi i demonstratave tona është domosdoshmëria e ndryshimit. Fillimisht zgjidhja e çështjeve të energjisë elektrike dhe gazit që do të shkaktojë shkatërrimin e ekonomisë sonë tashmë këtë vjeshtë. Ne i kërkuam kryeministrit Petar Fijala të negociojë me ne, por nuk kemi përgjigje. Prandaj do të kërkojmë dorëheqjen e qeverisë”, tha Jiri Havel, një nga organizatorët e protestës.
Kërkesa kryesore e organizatorëve të kësaj proteste “Republika Çeke së pari” është që qeveria e koalicionit të kryeministrit Fijala të japë dorëheqjen, të ndryshojë politika e jashtme e vendit ndaj Rusisë, nga e cila pritet gaz i lirë dhe që Çekia të shpallë neutralitet ushtarak, por edhe të fillojnë të marrin vendime në mënyrë të pavarur nga Organizata Botërore e Tregtisë apo organizatat e OKB-së.
“Republika Çeke duhet të çlirohet dhe të mos jetë subjekt i drejtpërdrejtë politik i BE-së, OBT-së dhe OUN-it”, thuhet në ftesën për protestë.
Si kërkesa e parë e menjëhershme, përveç dorëheqjes së menjëhershme të qeverisë, protestuesit vendosën që qeveria e dorëhequr të autorizojë ekspertë nga nacionalistët radikalë, komunistë dhe lëvizje e nisma të tjera antisistemike për të kontraktuar me Rusinë në emër të Republikës Çeke për çështjen urgjente të dërgimit të gazit të lirë.
Ata kërkojnë gjithashtu largimin e prodhuesve çekë nga bursat evropiane të energjisë elektrike dhe që e gjithë ekonomia çeke të çlirohet nga kapitali dhe kompanitë e huaja.
Demonstruesit shkuan në sheshin Wenceslas të pajisur me daulle dhe bilbila, flamuj kombëtarë dhe brohoritën për të hequr flamurin ukrainas nga Muzeu Kombëtar në krye të sheshit, ku qëndrojnë kundërshtarët e demonstruesve.
Pankartat përmbanin gjithashtu mesazhe për qeverinë dhe mesazhet anti-ukrainase nuk bënte përjashtim kërkesa që qeveria të ndalojë ndarjen sistematike të popullit çek nga ukrainasit. /abcnews.al
