Paris Saint-Germaini ka shënuar fitore me rezultat minimal 1-0 në shtëpi ndaj Angers në kuadër të javës së 28-të në elitën e futbollit francez.
Rasti i parë për gol i takoi PSG-së të cilët rrezikuan me anë të Goncalo Ramos në minutën e 31-të, por goditja e tij me kokë përfundoi mbi portë.
Vetëm pak minuta më vonë, Vitinha (35’) pati një rast të artë shënimi, por goditjen e tij e priti në mënyrë fantastike portieri mysafir.
Golin e fitores parisienët e gjetën në minutën e 55-të kur Desire Doue me një vollej goditje shënoi për 1-0 pas asistimit të Khvicha Kvaratskhelias.
Një tjetër rast të pastër shënimi e pati edhe Fabian Ruiz në minutën e 60-të, por sërish në skenë doli portieri i mysafirëve që bëri një tjetër super pritje.
Deri në fund PSG-ja e kontrolloi ndeshjen në tërësi duke marrë fitoren plotësisht të merituar.
Pas këtyre tri pikëve, PSG shkon në kuotën e 74 pikëve të grumbulluara, 24 më shumë se vendi i dytë që mbahet nga Monaco me 50 sosh, por këta të fundit me një ndeshje më pak të zhvilluar.
