Sezoni vjeshtor i alergjive është në kulmin e tij. Nga gushti deri në nëntor, shkaku më i zakonshëm i alergjive jashtë shtëpisë është poleni i ambrozisë, sipas American College of Allergy, Asthma and Immunology. Kjo sëmundje prek miliona njerëz në mbarë botën dhe shumë prej tyre aktualisht po përballen me simptomat.
“Astma është një gjendje afatgjatë që ndikon në aftësinë tuaj për të marrë frymë,” thekson pulmologu, dr. Raj Dasgupta. Ai shpjegon se ndodh ënjtje dhe ngushtim i rrugëve të frymëmarrjes në mushkëri, duke e vështirësuar hyrjen dhe daljen e ajrit.
Astma mund të prekë këdo, nga fëmijët te të rriturit, dhe zakonisht fillon në fëmijëri, sipas Index.hr.
Një studim tregon se gati 80 për qind e rasteve të astmës fillojnë në gjashtë vitet e para të jetës. Astma mund të shkaktohet nga faktorë të ndryshëm, duke përfshirë alergjitë (të brendshme dhe të jashtme), ndotjen ose madje edhe stresin.
Shkaktarë të ndryshëm
Alergjitë e brendshme shpesh shkaktohen nga faktorë si myku, qimet e kafshëve shtëpiake ose pluhuri, ndërsa alergjitë e jashtme zakonisht shkaktohen nga poleni.
Simptomat e njohura të astmës përfshijnë vështirësi në frymëmarrje, ndjenjën e ngushtësisë në gjoks dhe tingullin e fishkëllimës gjatë frymëmarrjes. Megjithatë, dr. Dasgupta thekson se ekziston një shenjë tjetër e astmës, një simptomë që shumica e njerëzve e anashkalojnë – kollitja që nuk largohet.
“Kjo kollë shpesh përkeqësohet natën ose gjatë ushtrimeve fizike. Simptomat mund të ndryshojnë shumë nga personi në person dhe nganjëherë shfaqen kur jeni afër tymit, pluhurit ose qimeve të kafshëve shtëpiake,” shpjegon ai.
Kolla e shkaktuar nga astma zakonisht është e thatë, që do të thotë se nuk ka shumë mukozë. Shumë njerëz mund ta injorojnë këtë simptomë, duke menduar se kollitja shkaktohet vetëm nga alergjitë ose ftohja. “Megjithatë, nëse vini re se kolliteni shpesh, veçanërisht natën ose gjatë aktiviteteve fizike, kjo mund të jetë një shenjë e astmës, prandaj është e rëndësishme të kërkoni ndihmë me kohë,” përfundoi dr. Dasgupta.
