Vladimir Putin bëri një vizitë të papritur në Mariupol, vizita e tij e parë në territorin e pushtuar nga forcat e tij gjatë agresionit kundër Ukrainës. Raportime të shumta nga mediat qeveritare në Rusi flasin për atë që ai po bënte në qytetin e shkatërruar.
Vizita ishte një akt i dukshëm kundërshtimi, i ardhur vetëm disa ditë pasi Gjykata Ndërkombëtare Penale lëshoi një urdhër arresti për të. Ai është akuzuar për krime lufte duke e lidhur me rrëmbimin e fëmijëve ukrainas dhe Putin nuk e ka komentuar këtë.
Shkuarja në Mariupolin e pushtuar është veçanërisht provokuese për ukrainasit, sepse Mariupol ka qenë prej kohësh një simbol i rezistencës që ka dëshmuar disa nga luftimet më intensive që nga fillimi i pushtimit të Rusisë.
Nga reagimet shihet se ai ka shkaktuar zemërimin e Ukrainës. Ministria e Mbrojtjes e krahasoi Putinin me një “hajdut” që vizitoi qytetin “nën mbulesën e natës” – me qytetin e rrënuar në ofensivën ruse.
Udhëtimin e Putinit në Mariupol e komentuan edhe këshilltarët e presidentit ukrainas dhe ministrit të Brendshëm, ndaj Mihajlo Podoljak tha se Putini është si një kriminel që kthehet në skenën e një krimi, ndërsa Anton Gerashçenko e krahasoi me Hitlerin.
Putin u dërgua në Mariupol me helikopter dhe vizitoi lagjet e qytetit me makinë, sipas pamjeve të publikuara nga autoritetet ruse.
Presidenti rus u shfaq gjithashtu duke u takuar me banorë në dukje të befasuar.
Putini i tha: “Ne duhet të fillojmë të njohim njëri-tjetrin më mirë.”
Kremlini këmbënguli se vizita ishte “spontane”. Gjatë udhëtimit, Kremlini tha se Putin bëri një xhiro në bregdetin e Mariupolit, duke vizituar një klub jahtesh dhe një ndërtesë teatri që u bombardua në Mariupol.
Zëvendëskryeministri rus Marat Khusnullin, i cili po e shoqëronte, foli në detaje me Putinin për “punën e ndërtimit dhe restaurimit në vazhdim” në qytet.
Në video, Husnulin i thotë Putinit: “Ka një plan për ta rindërtuar atë deri në fund të vitit të tretë. Ne planifikojmë ta bëjmë atë një aeroport plotësisht funksional të aftë për të fluturuar në të gjitha qytetet e Rusisë dhe jashtë saj.”
Kremlini shtoi se Putin zhvilloi një takim në “postën e komandës së një operacioni special ushtarak” në Rostov-on-Don.
Mariupol, një qytet port në Detin Azov, ndodhet në rajonin Donetsk të Ukrainës dhe ka qenë nën kontrollin e drejtpërdrejtë të Rusisë që nga maji 2022.
Ishte në Mariupol që forcat ruse kryen disa nga sulmet e tyre më famëkeqe, duke përfshirë një sulm në një maternitet marsin e kaluar dhe një bombardim në teatër.
Mariupol u bë një simbol i rezistencës ukrainase gjatë javëve të sulmeve të pamëshirshme ruse vitin e kaluar. Dihet se edhe kur pjesa më e madhe e qytetit ra, mbrojtësit e tij qëndruan në Uzinën e Çelikut Azovstal për javë të tëra përpara se fortesa të binte përfundimisht.
Nga 450,000 njerëz që jetonin në qytet para luftës, më shumë se një e treta tashmë janë larguar, raporton CNN.
