Putin theksoi se palët nuk mund të bien dakord për gjithçka që ka të bëjë me Karabakun. Ai shtoi se disa pjesë duhet të hiqen nga teksti i “përpunuar më parë në nivelin e specialistëve”
Pas samitit trepalësh në Sochi me presidentin azerbajxhanas, Ilham Aliyev dhe kryeministrin armen, Nikol Pashinyan, presidenti rus, Vladimir Putin, ka deklaruar se “Rusia do të sigurojë që të arrihet zgjidhja përfundimtare midis Armenisë dhe Azerbajxhanit”, transmeton Anadolu Agency (AA).
Putin njoftoi se në takim është rënë dakord për një “deklaratë të përbashkët në lidhje me rajonin e Karabakut”.
“Sipas mendimit tonë të përbashkët, ky ishte një takim shumë i dobishëm. Sipas mendimit tim, kjo krijoi një atmosferë shumë të mirë për marrëveshjet e mundshme të ardhshme për disa çështje themelore”, tha Putin në një deklaratë pas përfundimit të takimit.
Putin theksoi se palët nuk mund të bien dakord për gjithçka që ka të bëjë me Karabakun. Ai shtoi se disa pjesë duhet të hiqen nga teksti i “përpunuar më parë në nivelin e specialistëve”.
Më vonë, ai tha se Moska do të bëjë gjithçka për një zgjidhje përfundimtare midis Armenisë dhe Azerbajxhanit.
“Federata Ruse mbetet në kontakt me Armeninë dhe Azerbajxhanin për të vazhduar dialogun dhe për t’i dhënë fund konfliktit në këtë rajon”, theksoi Putin.
Më herët, Putin zhvilloi bisedime të ndara me Aliyev dhe Pashinyan me fokus në pikat individuale të bisedimeve të trajtuara nga presidenti azerbajxhanas dhe kryeministri armen gjatë takimit trepalësh.
Në muajin shtator, përleshjet vdekjeprurëse në kufirin Azerbajxhan-Armeni pranë Karabakut morën afër 300 jetë njerëzish.
Marrëdhëniet midis dy ish-republikave sovjetike kanë qenë të tensionuara që nga viti 1991, kur ushtria armene pushtoi Malësinë e Karabakut, një territor i njohur ndërkombëtarisht si pjesë e Azerbajxhanit.
Në vjeshtën e vitit 2020, në 44 ditë përplasjesh, Baku çliroi disa qytete, fshatra dhe vendbanime nga pushtimi armen, duke përfunduar me një armëpushim të ndërmjetësuar nga Moska. Marrëveshja e paqes festohet si një triumf në Azerbajxhan.
