Presidenti rus Vladimir Putin është i gatshëm të bisedojë me Volodymyr Zelenskyn “nëse është e nevojshme”, thotë Kremlini, por vë në dyshim legjitimitetin e presidentit ukrainas.
Zëdhënësi i Kremlinit, Dmitry Peskov, deklaroi se Putin do të ishte i gatshëm të zhvillonte negociata me presidentin ukrainas nëse është e nevojshme, por njëkohësisht vuri në pikëpyetje legjitimitetin e tij.
“Vetë Putin ka thënë se do të ishte i gatshëm të negocionte me Zelenskyn, nëse është e nevojshme, por baza ligjore për çdo marrëveshje kërkon diskutim, duke marrë parasysh realitetin se legjitimiteti i Zelenskyt mund të vihet në pikëpyetje,” tha ai për gazetarët.
Peskov theksoi gjithashtu se anëtarësimi i Ukrainës në Bashkimin Evropian është e drejta e saj sovrane dhe Rusia nuk ka ndërmend t’i diktojë Kievit si të veprojë në këtë çështje – por do të vendosë një vijë të kuqe kur bëhet fjalë për aleancat ushtarake.
“Flitet për integrimin dhe proceset e integrimit ekonomik. Dhe në këtë aspekt, natyrisht, askush nuk mund t’i diktojë asnjë vendi se çfarë të bëjë, dhe ne nuk kemi ndërmend ta bëjmë këtë,” tha Peskov.
Por kur bëhet fjalë për NATO-n, ai u shpreh:
“Ka një qëndrim krejtësisht ndryshe, natyrisht, kur bëhet fjalë për çështjet e sigurisë që lidhen me mbrojtjen apo aleancat ushtarake.”
Në një deklaratë që mund të shkaktojë shqetësim shtesë në Evropën Qendrore dhe Lindore, Peskov tha gjithashtu se:
“Një zgjidhje e qëndrueshme dhe afatgjatë është e pamundur pa një shqyrtim gjithëpërfshirës të çështjeve të sigurisë në kontinent.”
Ai shtoi gjithashtu se bisedimet në Riad mund të ofrojnë më shumë qartësi për një takim të mundshëm midis Vladimir Putin dhe Donald Trump, por deri më tani nuk ka asnjë marrëveshje në këtë drejtim.
