Nëntë anëtarë të Dhomës së Përfaqësuesve të Kongresit amerikan nga Partia Republikane u rreshtuan përkrah kolegëve të tyre nga Partia Demokratike dhe rrëzuan nismën e paraqitur nga Mike Johnson, republikani kryesor në këtë trup dhe bashkëpunëtor i ngushtë i Donald Trump-it.
Konkretisht, Johnson u përpoq të parandalonte votimin për një propozim që do t’u jepte anëtarëve të Dhomës së Përfaqësuesve të drejtën të votojnë përmes ndihmësve të tyre, kur ndodhen në shtëpi duke u kujdesur për një foshnjë të sapolindur.
Ky propozim kishte mbështetje nga të dyja partitë dhe u propozua zyrtarisht nga përfaqësuesja Anna Paulina Luna nga Partia Republikane dhe Brittany Pettersen nga Partia Demokratike.
Johnson u përpoq ta “vriste” votimin për këtë propozim, por në fund nëntë republikanë u bashkuan me të gjithë 213 demokratët dhe e rrëzuan përpjekjen e tij.
Ai u përpoq të sqarojë se “nuk është kundër familjes”, por se me këtë propozim “do të hapej kutia e Pandorës” dhe “ndoshta pas kësaj askush nga përfaqësuesit nuk do të vinte më në Kongres.”
Mediet amerikane theksojnë se kjo është hera e parë që anëtarët e Partisë Republikane tregojnë rezistencë që nga koha kur Trump u bë president i SHBA-së.
Në këtë kontekst, Johnson konsiderohet si një nga bashkëpunëtorët më të afërt të Trump-it në Kongres, dhe për këtë arsye rëndësia e këtij veprimi nga republikanët “thellohet” edhe më shumë.
