Raportuesja Speciale e Kombeve të Bashkuara për Palestinën, Francesca Albanese, paralajmëroi se Izraeli do të vazhdojë dhunën kundër palestinezëve nëse nuk ndërmerret asgjë, duke theksuar se nuk ka mbetur shumë kohë për ta shpëtuar popullin palestinez.
Ajo iu drejtua pjesëmarrësve në një ngjarje dyditore për Palestinën, të mbajtur kohët e fundit në periferi të Parisit, si dhe më pas deklaroi për Anadolu se Izraeli kurrë nuk e ka respektuar armëpushimin që nga hyrja e tij në fuqi në janar.
Albanese pohon se Izraeli nuk ka qëllim ta ndalë ofensivën e tij për disa arsye:
“Sepse kryeministri izraelit Benjamin Netanyahu do të përballet me drejtësinë sapo të ndalë luftën kundër palestinezëve. Ndoshta keni vënë re se Netanyahu duhej të paraqitej në gjykatë një ditë pasi urdhëroi një sulm të ri ndaj banorëve të Gazës. Pra, pyetja është: a ka pasur ndonjë lidhje? Ndoshta”, shtoi ajo.
“E di që ai ka problemet e tij, me drejtësinë kombëtare dhe ndërkombëtare, edhe pse nuk kam më shpresë për drejtësi në nivel kombëtar në Izrael apo ndërkombëtar, sepse po e shihni që të gjithë janë gjithnjë e më të gatshëm t’i shtrijnë tapetin e kuq”, tha Albanese.
Ajo paralajmëroi se “kolonët ideologjikë” të qeverisë izraelite duan të aneksojnë Gazën dhe Bregun Perëndimor të pushtuar.
Ajo theksoi se Izraeli po e përdor këtë moment historik, së bashku me dobësinë e Evropës dhe agresivitetin e Shteteve të Bashkuara të Amerikës, si një mundësi për të avancuar në pushtimin jo vetëm të Palestinës, por edhe të Lindjes së Mesme.
“Sulmet kundër Libanit, kundër Sirisë po vazhdojnë. Do të ishte çmenduri të mendosh se Izraeli do të ndalet këtu”, tha ajo.
Albanese hodhi poshtë ndikimin e grupeve proizraelite që po përpiqen ta përfundojnë mandatin e saj në OKB.
E drejta ndërkombëtare si udhërrëfyes
Raportuesja e OKB-së, Albanese, theksoi se ndalimi i veprimeve izraelite është i mundur brenda kuadrit të së drejtës ndërkombëtare.
“E drejta ndërkombëtare na tregon çfarë duhet të bëjmë: ta përfundojmë okupimin, ta përfundojmë gjenocidin, ta përfundojmë aparteidin. Megjithatë, një mjet tjetër themelor i nevojshëm për këtë është vullneti i shteteve – dhe ai nuk ekziston”, tha ajo.
Ajo gjithashtu paralajmëroi se gjenocidi izraelit në Gaza po intensifikohet për ta përmbushur planin e spastrimit etnik në Palestinë.
“Është e qartë se Izraeli dëshiron territore nga Mesdheu deri në lumin Jordan për ta vendosur sovranitetin e popullit hebre, kjo është ajo që ata thonë”, shtoi ajo.
Ajo gjithashtu tha se palestinezët ende po e paguajnë çmimin e antisemitizmit të evropianëve nga afro një shekull më parë.
Ushtria izraelite rinisi sulmet vdekjeprurëse ndaj Gazës më 18 mars dhe që atëherë ka vrarë afro 1.500 njerëz, ka plagosur rreth 3.700 të tjerë dhe ka shkelur armëpushimin e janarit dhe marrëveshjen për shkëmbim të të burgosurve.
Javën e kaluar, kryeministri izraelit Benjamin Netanyahu njoftoi një përshkallëzim të mëtejshëm të sulmeve në Gaza, në mes të përpjekjeve për ta zbatuar planin e ish-presidentit amerikan Donald Trump për zhvendosjen e palestinezëve nga enklava.
Më shumë se 50.800 palestinezë janë vrarë në Gaza nga sulmi brutal izraelit që nga tetori 2023, shumica prej tyre gra dhe fëmijë.
Gjykata Ndërkombëtare Penale lëshoi në nëntor të vitit të kaluar urdhra arresti për Netanyahun dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.
Izraeli gjithashtu po përballet me një padi për gjenocid në Gjykatën Ndërkombëtare të Drejtësisë.
