Revolta e gjyqtarëve për uljen e pagave nisi nga e enjtja.
Vendimi i tyre për të ofruar vetëm shërbime esenciale shtyu 150 seanca gjyqësore që ishin planifikuar të mbahen në Gjykatën Themelore të Prishtinës, pa përfshirë degët e këtij institucioni.
Këtë sjellje të gjyqtarëve e prokurorëve tha se nuk po e kupton ministrja e Drejtësisë, Albulena Haxhiu.
“Për shkak të reformave që ka nisur Ministria e Drejtësisë, gjithnjë është përcjellë me probleme të ndryshme. Ne kemi nisur Vettingun, ata e kanë bojkotuar, prapë jemi takuar, sërish kanë bojkotuar”, tha Haxhiu.
Kjo insistoi që vendimi i qeverisë për të zvogëluar pagat kësaj kategorie është i drejtë.
Haxhiu gjithashtu kujtoi që personalisht për ligjin e miratuar nga qeveria e Haradinajt kishte iniciuar edhe proces gjyqësor, por siç tha, nuk u thirr kurrë nga Prokuroria Speciale.
Megjithatë, shfuqizimi i vendimit, që për Haxhiun është jo i ligjshëm, e befasoi ambasadorin e Bashkimit Evropian në Kosovë, Tomas Szunyog, i cili tha se financimi adekuat dhe pavarësia e institucioneve gjyqësore janë gurthemele të sistemit të sundimit të ligjit dhe kërkesa themelore të procesit integrues në BE.
