Lajmi se legjenda portugeze Cristiano Ronaldo (40) po e shqyrton seriozisht mundësinë për t’u bërë pronar i Valencias u publikua që në fund të shkurtit, ndërsa tani gazetari spanjoll Julián Redondo ka konfirmuar se diçka konkrete po ndodh vërtet.
Në kolumnën e tij për Mundo Deportivo, ai shkroi se Ronaldo do të bëhet pronari i ri i Valencias, por me një kusht të vetëm – që klubi të ruajë statusin në La Liga.
Aktualisht, Valencia ndodhet në vendin e 15-të të renditjes me 31 pikë, vetëm katër më shumë se zona e rënies nga liga, ndërsa kanë mbetur edhe nëntë javë deri në fund të sezonit.
Në xhiron e radhës, ata udhëtojnë për t’u përballur me Real Madridin – një sfidë që nuk pritet të jetë e lehtë.
Nga ana tjetër, Ronaldo po zhvillon sezonin e tij të tretë me klubin saudit Al-Nassr, por tashmë ka filluar të mendojë për jetën pas përfundimit të karrierës së tij si futbollist profesionist.
Ai tashmë ka nisur disa sipërmarrje biznesi, përfshirë rrjete hotelesh, qendra fitnesi dhe marka të ndryshme, por duket se dëshira e tij është të mbetet i lidhur me futbollin.
Ronaldo ka shfaqur interesim për të marrë drejtimin e Valencias, klub i cili aktualisht drejtohet nga Peter Lim – një figurë e kritikuar ashpër prej kohësh nga tifozët e ekipit.
Sipas disa burimeve, Ronaldo do të kishte mbështetje financiare nga princi saudit Mohammed bin Salman dhe familja e tij në këtë ndërmarrje.
