Afërsisht 1.5 milionë qytetarë turq me të drejtë vote që jetojnë në Gjermani mund të votojnë në zgjedhjet parlamentare dhe presidenciale të mbajtura në Turqi më 14 maj.
Anëtarët e komunitetit më të madh turk jashtë Turqisë mund të votojnë në zgjedhje deri më 9 maj në 16 qendra votimi të miratuara nga Ministria e Jashtme gjermane. Autoritetet turke kishin propozuar më parë 26 qendra votimi.
Anëtari i parlamentit turk dhe avokati gjerman Mustafa Yeneroglu u bëri thirrje votuesve turq në Gjermani të votojnë për “shtetin e ligjit dhe demokracinë”.
Turqit në Gjermani tradicionalisht zgjedhin kandidatë konservatorë
Votuesit turq në Gjermani tradicionalisht zgjedhin kandidatët konservatorë në zgjedhje. Në zgjedhjet e fundit të vitit 2018, presidenti aktual Rexhep Tajip Erdogan mori mbështetjen e 65 për qind të votuesve në Gjermani, ndërsa në Turqi kjo mbështetje, me 53 për qind të votave, ishte dukshëm më e ulët.
Pesë vjet më parë, tensionet u ngritën midis qeverisë turke dhe gjermane lidhur me ndalimin e politikanëve turq nga mitingjet publike zgjedhore në Gjermani, me presidentin Erdogan që fajësoi autoritetet gjermane për bllokimin e përpjekjeve të fushatës së tij. Këtë herë nuk priten tensione të tilla.