Autoritetet ruse kanë thënë se do të ngrenë pika kontrolli në disa nga kufijtë e Rusisë për të mobilizuar me forcë burrat rusë që po përpiqen të shmangin rekrutim duke ikur nga vendi.
Mobilizimi rus në kufi është duke u zhvilluar
Ministri i Brendshëm rus për Osetinë e Veriut, Alania Andrey Sergeyev tha në Telegram se “fluksi i automjeteve personale që lëvizin drejt Gjeorgjisë po rritet seriozisht” dhe se “pika e mobilizimit të zyrës së regjistrimit dhe rekrutimit ushtarak do të vendoset në pikën e kontrollit në të ardhmen e afërt. ”
Instituti për Studimin e Luftës (ISW) tha se pamjet që u shfaqën në mediat sociale tregonin automjete ushtarake ruse që lëviznin drejt kufirit, gjoja për të ngritur një pikë kontrolli mobilizimi.
ISW raporton gjithashtu se Ministria ruse e Mbrojtjes ka mohuar zërat se zyrtarët rusë u kanë kërkuar qeverive të Gjeorgjisë, Kazakistanit dhe vendeve të tjera që të ekstradojnë me forcë burrat që ikin nga mobilizimi përsëri në Rusi. Ministri i Brendshëm i Kazakistanit Marat Akhmetzhanov u tha gazetarëve se Kazakistani do të ekstradonte vetëm njerëzit që kanë kryer një krim që është gjithashtu i paligjshëm në Kazakistan dhe janë nën një urdhër ndërkombëtar, por nuk mohoi në mënyrë specifike zërat për dërgimin e njerëzve në Rusi.
Meqë ra fjala, një media e pavarur ruse njoftoi pak ditë më parë se Kremlini planifikon që nga 28 shtatori, pra pas referendumit që u mbajt deri dje, t’i ndalojë burrat e moshës ushtarake, të cilët do të përfshihen në mobilizim, të largohen nga Rusia. Moska nuk ka dashur t’i konfirmojë këto pretendime, por duket se kjo ka filluar të ndodhë.
Mobilizimi edhe në territoret e pushtuara që Rusia do të aneksojë
Instituti për Studimin e Luftës thekson në analizën e tij të re se zyrtarët rusë po përgatisin kushtet për mobilizimin e detyruar ose rekrutimin e civilëve ukrainas në zonat e Ukrainës së pushtuar që së shpejti do të aneksohen nga Rusia.
Sipas ISW, kreu i rajonit të Luhanskut në Ukrainë, Sergej Hajday, raportoi dje, më 27 shtator, se zyrtarët rusë kanë filluar të përdorin listat e të diplomuarve të shkollës së mjekësisë në Luhansk për të mobilizuar me forcë mjekët për të ndihmuar forcat ruse.
Forcat ruse thuhet gjithashtu se po dërgojnë njerëz të sapomobilizuar dhe të patrajnuar në vijat e frontit të rajoneve Kherson dhe Kharkiv, thotë ISW.
