Ambasada ruse në Damask tha se u kujton qytetarëve mundësinë e largimit nga Siria me fluturime komerciale për shkak të “situatës së vështirë ushtarake dhe politike”
Rusia këshillon qytetarët e saj në Siri që të largohen nga vendi, pasi burimet lokale thanë më herët se grupet e armatosura kundër regjimit kanë arritur në qendër të qytetit Homs, transmeton Anadolu.
Një deklaratë e ambasadës ruse në Damask në Telegram tha se ajo u kujtoi qytetarëve të saj mundësinë e largimit nga Siria me fluturime komerciale “për shkak të situatës së vështirë ushtarake dhe politike”.
“Ambasada dhe Seksioni Konsullor vazhdojnë të funksionojnë si zakonisht”, thuhet në deklaratë.
Deklarata nga ambasada erdhi ndërsa burimet lokale thanë më herët sot se grupet e armatosura kundër regjimit kanë arritur në qendrën e qytetit Homs.
Përleshjet midis forcave të regjimit sirian dhe grupeve kundër regjimit shpërthyen fillimisht më 27 nëntor në zonën rurale perëndimore të Halepit.
Deri më 30 nëntor, forcat opozitare kishin marrë kontrollin e pjesës më të madhe të qendrës së qytetit të Halepit dhe kishin dominuar në gjithë provincën Idlib.
