Kryediplomati rus tha se përfundimi kryesor që SHBA duhet të nxjerrë nga lufta afgane është se “është e kotë të mësosh të tjerët si të jetojnë”
Ministri i Jashtëm i Rusisë, Sergey Lavrov, tha se fushata afgane duhet t’ia bëjë të qartë SHBA-së se demokracia nuk mund t’u imponohet të tjerëve, transmeton Anadolu Agency (AA).
Duke folur në një konferencë të përbashkët për media pas takimit me homologun e tij austriak Alexander Schallenberg në kryeqytetin Vjenë, Lavrov tha se përfundimi kryesor që SHBA duhet të nxjerrë nga lufta afgane është se “është e kotë të mësosh të tjerët si të jetojnë”.
“Ne kemi mbikëqyrur në Libi, Siri, Irak dhe Afganistan se si amerikanët donin t’i detyronin të gjithë të jetonin ashtu siç e konsideronin të arsyeshëm amerikanët. Secili duhet të merret me problemet e veta, ka mjaft prej tyre në çdo vend”, tha ai, duke shtuar: “Ne nuk duhet të ndërhyjmë në punën e dikujt tjetër. Ne nuk duhet të përdorim forcë në një mënyrë që shkel Kartën e OKB-së.”
Schallenberg e quajti çështjen afgane “temën më serioze në agjendën ndërkombëtare”.
Ai i bëri thirrje komunitetit ndërkombëtar të bëjë gjithçka që është e mundur për të parandaluar që Afganistani të “bëhet një inkubator i terrorizmit ndërkombëtar” dhe të ndalojë një valë të re migrimi nga atje.
Kryediplomati austriak tha se vendi i tij po bën përpjekje për të trajtuar krizën afgane pasi konsideron se evakuimi i afganëve nuk mund të jetë përgjigja e vetme ndaj krizës.
Ai tha se si pjesë e këtyre përpjekjeve, Vjena javën e ardhshme do të mbajë një konferencë me fqinjët e Afganistanit: Taxhikistanin, Uzbekistanin dhe Turkmenistanin.
Talebanët morën kontrollin e Afganistanit pasi morën kryeqytetin Kabul më 15 gusht, duke detyruar presidentin dhe zyrtarë të tjerë të lartë të largohen nga vendi.
Përparimi i shpejtë i talebanëve shkaktoi një eksod nga vendi, me mijëra që u përpoqën të largoheshin nga aeroporti ndërkombëtar i Kabulit, që është zona e vetme e vendit ende nën kontrollin e SHBA-së.
