Zëvendësministri i Punëve të Jashtme të Rusisë, Sergej Rjabkov, ka zbuluar se Rusia ka refuzuar zyrtarisht planin e presidentit amerikan Donald Trump për përfundimin e luftës në Ukrainë.
Rjabkov deklaroi se Amerika “nuk e ka marrë parasysh kërkesën kryesore të Rusisë” dhe se Moska nuk do ta pranojë planin e përgatitur nga administrata Trump.
“Ende nuk kemi parë asnjë sinjal nga Trump për Kievin që kjo luftë duhet të përfundojë,” – tha Rjabkov për revistën ruse International Affairs.
Ai shtoi gjithashtu se Rusia ka parë “vetëm disa skema” që “çojnë në skema të tjera”, nga të cilat “nuk do të dalë asgjë në fund”.
Megjithëse Donald Trump në planet e tij kishte përjashtuar mundësinë që Ukraina të anëtarësohet në NATO, gjë që është një nga kërkesat kryesore të Rusisë për përfundimin e luftës, presidenti rus Vladimir Putin vazhdon të mos pranojë asnjë marrëveshje për përfundimin e konfliktit.
Trump më herët kishte kritikuar ashpër presidentin ukrainas Volodymyr Zelensky për skepticizmin e tij ndaj planeve për përfundimin e luftës.
Megjithatë, Zelensky, nën presion të madh, pranoi një marrëveshje për ndërprerje të përkohshme të luftimeve për një muaj, si dhe marrëveshje të tjera, veçanërisht atë që i jep SHBA-së kontroll mbi shfrytëzimin dhe shitjen e mineraleve të rralla të Ukrainës.
Pavarësisht kësaj, Rusia refuzoi të pranojë planin për përfundimin e luftës dhe madje, sipas Zelenskyt, shkeli marrëveshjen për ndalimin e sulmeve ndaj infrastrukturës energjetike – marrëveshje kjo që kishte dalë nga bisedimet e zhvilluara në kryeqytetin saudit, Riad./Gazetaere
