Severe Weather Europe (SWE) ka publikuar një parashikim të ri afatgjatë për dimrin, sipas të cilit SHBA dhe Kanada mund të presin më shumë borë, por në Evropë duket se do të ketë më pak se sa ishte parashikuar fillimisht.
Sipas dy sistemeve kryesore globale të parashikimeve afatgjata, ECMWF dhe UKMO, në të cilat bazohet SWE, në pjesën më të madhe të Evropës do të ketë më pak reshje dëbore se sa kishin parashikuar fillimisht parashikimet afatgjata.
Mesatarja sezonale tregon një sasi nën mesatare të borës në pjesën më të madhe të kontinentit evropian. Megjithatë, mbi Skandinavi parashikohen më shumë reshje dëbore se zakonisht për shkak të ndikimit të sistemit të presionit të ulët dhe rrjedhës së ajrit mbi Evropën veriore. Parashikimi për dhjetorin tregon më pak reshje dëbore se zakonisht në pjesën më të madhe të kontinentit. Një zonë e vogël me reshje të zakonshme dëbore është treguar mbi Alpe, me më shumë borë sërish mbi Skandinavinë veriore.
Parashikimi për janarin tregon një potencial të ulët për reshje dëbore në pjesën më të madhe të kontinentit. Në përgjithësi, parashikimi është shumë i ngjashëm me muajin e mëparshëm, me ndoshta edhe më pak borë mbi Alpe.
Në shkurt nuk priten përmirësime të mëdha dhe në pjesën më të madhe të kontinentit priten shumë më pak reshje dëbore se zakonisht, përveç pjesëve veriore nën ndikimin e rrjedhës së ajrit. Në Alpe janë treguar disa zona të vogla me reshje, të ngjashme me dhjetorin.
Sezon i dobët i borës
Edhe sipas modelit UKMO, parashikohen shumë pak reshje dëbore në pjesën më të madhe të kontinentit, përveç disa pjesëve veriore nën ndikimin e rrjedhës së ajrit. Parashikimi për dhjetorin tregon më pak reshje dëbore mbi Evropë, megjithëse mbi zonën subalpine priten më shumë reshje dëbore.
As janari nuk sjell ndryshime të mëdha dhe potenciali për reshje dëbore është zvogëluar më tej, dhe më shumë reshje dëbore priten vetëm në veriun e skajshëm. Në shkurt pritet edhe më pak borë.
Me pak fjalë, të dy modelet – ECMWF dhe UKMO – parashikojnë një sezon të dobët dëbore mbi Evropë, përveç zonave të skajshme veriore dhe disa pjesëve qendrore rreth Alpeve.
