Festat e Krishtlindjeve kanë mbërritur, dhe shumë futbollistë nga e gjithë bota mbrëmë, në Natën e Krishtlindjes, kanë postuar fotografi me familjet e tyre pranë bredhit në rrjetet sociale. Megjithatë, një emër mungoi.
Vite me radhë, Mohamed Salah ka tërhequr vëmendjen më të madhe në mediat botërore për Natën e Krishtlindjes dhe Krishtlindjet, duke postuar rregullisht fotografi me gruan e tij Maggi dhe vajzat Makka dhe Kayan pranë bredhit.
Fotografitë e Salah çdo Krishtlindje nxisin reagime të shumta. Disa e lavdërojnë atë për respektimin e traditave në Angli, ndërsa të tjerët e kritikojnë sepse ai është mysliman dhe zbukurimin e bredhit për Krishtlindje e konsiderojnë të papërshtatshëm.
Këtë vit, Salah më 24 dhjetor në mbrëmje postoi një fotografi në profilin e tij në Instagram, por jo me bredhin.
Golashënuesi dhe asistenti më i mirë i Premier Ligës e kaloi Natën e Krishtlindjes në palestër, duke u përgatitur për sfidat e reja që e presin.
Liverpool luan nesër kundër Leicesterit, dhe fotografia e Salah nga palestra e befasoi Fabrizio Romano.
Eksperti më i njohur për transferimet reagoi ndaj fotografisë së Salah për Natën e Krishtlindjes, duke përdorur dy emotikone – një tru dhe një robot – për të lavdëruar mentalitetin dhe etikën e tij të punës.
