Pas një votimi të organizuar së fundmi në faqen e Instagramit të National Geographic Travel, Sarajeva është zyrtarisht shpallur destinacioni më i mirë në botë sipas zgjedhjes së lexuesve të këtij reviste.
“Është zyrtare: Sarajeva është fituesi ynë sipas zgjedhjes së lexuesve për vitin 2025”, shkruan në faqen e Instagramit të National Geographic Travel.
Bëhet fjalë për listën “Best of the World 2025”, e cila përmban destinacione që duhet t’i vizitoni vitin e ardhshëm, të përzgjedhura me kujdes nga eksploruesit, fotografët dhe redaktorët e National Geographic.
Kujtojmë se National Geographic organizoi një votim në faqen e tij në Instagram, i cili zgjati deri më 17 tetor, dhe shumicën e votave i mori kryeqyteti i Bosnjës dhe Hercegovinës. Kështu, Sarajeva u rendit në listën e 25 destinacioneve për vitin 2025 të rekomanduara nga National Geographic.
National Geographic vëren se Sarajeva vazhdon të frymëzojë udhëtarët kuriozë nga e gjithë bota dhe se nuk është për t’u habitur që ky qytet fitoi bindshëm në zgjedhjen e lexuesve të këtij viti.
“Historia shumë shekullore e Sarajevës është e gdhendur në bukuritë e saj natyrore, si lumi Miljacka, që rrjedh nën më shumë se dhjetë ura, përfshirë Urën Latine dhe urën për këmbësorë në Skenderi, e ndërtuar nga të njëjtat materiale si Kulla Eiffel sipas legjendës lokale,” thuhet në faqen e internetit të National Geographic.
Më tej në tekst, ata theksojnë se adhuruesit e historisë mund t’i bëjnë nderime rezistencës së qytetit duke vizituar vendet historike, si Tuneli i Shpëtimit.
“Për dashamirët e verës, ata mund të provojnë varietetet e njohura vendase si Žilavka, Blatina ose Vranac. Aventurierët mund të shkojnë në rafting në lumë, ski alpine ose të ecin deri te një nga ujëvarat më madhështore në Evropë,” thekson National Geographic në rekomandimet e tij për të vizituar Sarajevën dhe Bosnjën dhe Hercegovinën.
