“Turqia ka komunikim të hapur me të dyja palët. Ne do të vazhdojmë të inkurajojmë dialogun për të arritur një marrëveshje për targat e automjeteve dhe çështje të tjera të mbetura”, tha Çavuşoğlu pas takimit me kryediplomatin serb
Ministri i Jashtëm serb, Nikolla Selakoviç, tha se vendi i tij llogarit në mbështetjen e Türkiye-s për vazhdimin e bisedimeve për zgjidhjen e mosmarrëveshjeve me Kosovën, raporton Anadolu Agency (AA).
Dialogu midis Beogradit dhe Prishtinës “do të çojë në një kompromis dhe një zgjidhje të pranueshme reciprokisht dhe do të kontribuojë në ruajtjen e paqes dhe stabilitetit rajonal”, tha Selakoviç në një deklaratë pas takimit me homologun e tij turk Mevlüt Çavuşoğlu në Beograd.
Serbia dhe Kosova ranë dakord javën e kaluar për një politikë të re kufitare nën një proces dialogu të lehtësuar nga Bashkimi Evropian (BE).
Selakoviç dhe Çavuşoğlu shprehën gjithashtu kënaqësinë për “bashkëpunimin gjithnjë e më intensiv ekonomik” midis Serbisë dhe Türkiye-s, i cili tashmë ka sjellë një rritje “të konsiderueshme” të tregtisë dypalëshe këtë vit, thuhet në deklaratë, ku shtohet se marrëdhëniet midis Serbisë dhe Türkiye-s “janë në nivelin më të lartë në historinë e fundit”.
Çavuşoğlu ka udhëtuar në Beograd për një vizitë zyrtare dy-ditore për të marrë pjesë në samitin e iniciativës “Ballkani i Hapur”.
Në fjalimin e tij në samitin më herët gjatë ditës, ai theksoi se Ankaraja do të vazhdojë të inkurajojë dialogun ndërmjet Serbisë dhe Kosovës.
“Marrëveshja (e fundit) për kartat e identitetit tregon meritën e përqendrimit në interesat tona të përbashkëta dhe jo në dallimet”, tha Çavuşoğlu, duke shtuar: “Turqia ka komunikim të hapur me të dyja palët. Ne do të vazhdojmë të inkurajojmë dialogun për të arritur një marrëveshje për targat e automjeteve dhe çështje të tjera të mbetura”.
