Presidenti amerikan Donald Trump njoftoi daljen nga Organizata Botërore e Shëndetësisë (OBSH) duke akuzuar se ajo ka vepruar keq gjatë pandemisë COVID-19 dhe krizave të tjera ndërkombëtare shëndetësore.
Ai gjithashtu konsideron se OBSH nuk ka arritur të jetë e pavarur nga ndikimet e papërshtatshme politike të vendeve anëtare dhe, siç theksoi, kërkon pagesa të mëdha që janë të pabarabarta me ato që kontribuojnë vende si Kina.
“OBSH na ka grabitur, të gjithë po e grabisin Shtetet e Bashkuara të Amerikës. Kjo nuk do të ndodhë më,” tha Trump gjatë nënshkrimit të një urdhri ekzekutiv për tërheqjen.
Ky shtet do të largohet nga OBSH brenda 12 muajve, që automatikisht do të thotë ndërprerje e kontributeve financiare.
Nga Organizata Botërore e Shëndetësisë shprehën keqardhje për këtë njoftim, duke theksuar se OBSH luan “një rol kyç në mbrojtjen e shëndetit dhe sigurisë së njerëzve në botë, përfshirë amerikanët, duke adresuar shkaqet kryesore të sëmundjeve, ndërtimin e sistemeve më të forta shëndetësore dhe zbulimin, parandalimin dhe reagimin ndaj emergjencave shëndetësore, përfshirë shpërthimet e sëmundjeve, shpesh në vende të rrezikshme ku të tjerët nuk mund të shkojnë.”
“Shtetet e Bashkuara të Amerikës ishin një nga themeluesit e OBSH-së në vitin 1948 dhe që atëherë kanë marrë pjesë në formësimin dhe menaxhimin e punës së saj, së bashku me 193 vende të tjera anëtare, duke përfshirë pjesëmarrjen aktive në Asamblenë Botërore të Shëndetësisë dhe Bordin Ekzekutiv. Për më shumë se shtatë dekada, OBSH dhe SHBA kanë shpëtuar jetë të panumërta dhe kanë mbrojtur amerikanët dhe njerëzit anembanë botës nga kërcënimet shëndetësore. Së bashku kemi eliminuar linë dhe kemi çuar poliomielitin në prag të zhdukjes. Institucionet amerikane kanë kontribuar dhe kanë përfituar nga anëtarësia në OBSH. Me pjesëmarrjen e SHBA-së dhe vendeve të tjera anëtare, OBSH ka realizuar grupin më të madh të reformave në historinë e saj gjatë shtatë viteve të fundit, për të transformuar përgjegjësinë, koston dhe ndikimin në vende. Ky punim vazhdon,” thuhet në deklaratë.
CNN raportoi përgjigjen e doktorit Ashish Jha, i cili ishte koordinator i përgjigjes së Shtëpisë së Bardhë ndaj COVID-19 gjatë administratës Biden, duke e quajtur vendimin e Trump për t’u tërhequr nga OBSH gjatë mandatit të tij të dytë “një gabim strategjik.”
“OBSH është një organizatë mjaft e rëndësishme dhe tërheqja e Amerikës krijon një vakum politik që vetëm një shtet mund ta plotësojë, dhe ai është Kina,” tha Jha në një intervistë për CNN të hënën.
Ai parashikoi që Kina do të forcojë organizatën në mungesë të financimit dhe udhëheqjes amerikane, gjë që mund të “i japë Kinës më shumë ndikim politik në mbarë botën.”
