Zëdhënësi i Këshillit të Sigurisë Kombëtare, John Kirby, tha se nëse lideri rus do të përdorë armët e fundit të botës, “do të ketë pasoja të rënda”, pa zbuluar veprime specifike që SHBA-ja do të ndërmerrte
Shtëpia e Bardhë ka deklaruar se SHBA-ja i merr “shumë seriozisht” kërcënimet e “papërgjegjshme” të presidentit rus, Vladimir Putin, për përdorimin e armëve bërthamore, transmeton Anadolu Agency (AA).
Zëdhënësi i Këshillit të Sigurisë Kombëtare, John Kirby, tha se nëse lideri rus do të përdorë armët e fundit të botës, “do të ketë pasoja të rënda”, pa zbuluar veprime specifike që SHBA-ja do të ndërmerrte.
“Jo vetëm që ai do të jetë shumë më i keq në skenën botërore, por do të duhet edhe të ketë pasoja të rënda nga komuniteti ndërkombëtar”, tha Kirby gjatë një interviste për ‘ABC News’.
Më herët, presidenti rus, Vladimir Putin njoftoi një mobilizim masiv prej 300 mijë rezervistësh për të mbështetur përpjekjet e tij të luftës në Ukrainë, duke lëshuar një paralajmërim të tmerrshëm përpara referendumeve të planifikuara në pjesë të Ukrainës të denoncuara nga Perëndimi si “përpjekje e rremë” për të aneksuar territore të tjera ukrainase.
“Kur integriteti territorial i vendit tonë kërcënohet, ne sigurisht do të përdorim të gjitha mjetet që kemi në dispozicion për të mbrojtur Rusinë dhe popullin tonë. Ky nuk është bllof”, deklaroi Putin.
Lëvizja vjen një ditë pas shpalljes së referendumeve në rajonet ukrainase, respektivisht në rajonet Donetsk, Luhansk, Kherson dhe Zaporizhzhia. Putin dhe përfaqësuesit e tij rajonal po synojnë të përdorin zgjedhjet për të deklaruar territoret si pjesë të Rusisë.
Kirby tha se veprimet janë një reflektim i pengesave të Rusisë në fushën e betejës, ndërsa ushtria e Ukrainës po bën përparime shtesë pasi shkatërroi forcat e Kremlinit nga rajoni verilindor Kharkiv.
“Pasi ai nuk mund t’i marrë në mënyrë legjitime disa nga këto zona, ai po përpiqet të ketë një lloj legjitimiteti politik të tyre, në mënyrë që të mund të deklarojë se janë territore ruse. Nuk janë. Nuk do të jenë as si rezultat i referendumeve të rreme. Ky është territor ukrainas, nuk ka rëndësi se çfarë referendumesh të rreme do të organizojnë ose do të votojnë, ata do të jenë territore ukrainase”, tha Kirby.
Duke folur drejtpërdrejt për mobilizimin e trupave të urdhëruar nga presidenti rus, Kirby tha se veprimi është “padyshim një shenjë se ai po vuan”.
“Ne e dimë se ai ka pësuar dhjetëra mijëra viktima. Ai ka moral të tmerrshëm. Kohezioni i njësisë në fushën e betejës, komanda dhe kontrolli akoma nuk janë zgjidhur. Ai ka probleme dezertimi dhe po i detyron të plagosurit të kthehen në luftë. Pra, qartë, fuqia punëtore është problem për të. Ai ndihet i rrezikuar”, tha Kirby.
