“Sot, Irani po shkon drejt diktature, diktature ushtarake. 80 milionë njerëz jetojnë në Iran dhe mendoj se 90 për qind e njerëzve jetojnë në një situatë shumë të keqe”, tha Asselborn
Ministri i Punëve të Jashtme i Luksemburgut, Jean Asselborn, ka bërë të ditur se Bashkimi Evropian (BE) do të paraqesë një paketë të re sanksionesh që do të përfshijë edhe 30 individë iranianë për rolin e tyre në shtypjen e sigurisë në Iran, transmeton Anadolu Agency (AA).
Duke folur për mediat para një takimi të ministrave të jashtëm të BE-së në Bruksel, Asselborn tha se në mesin e individëve ka anëtarë të Korpusit të Gardës Revolucionare të Iranit.
“Sot, Irani po shkon drejt diktature, diktature ushtarake. 80 milionë njerëz jetojnë në Iran dhe mendoj se 90 për qind e njerëzve jetojnë në një situatë shumë të keqe”, tha Asselborn.
Irani është tronditur nga protesta vdekjeprurëse që nga mesi i muajit shtator, pas vdekjes së 22-vjeçares Mahsa Amini, e cila u arrestua nga policia morale e vendit me akuzat për shkelje të kodit islamik të veshjes.
“Ne nuk mund të ndryshojmë botën vetëm me sanksione. Kjo është e qartë, por është gjithçka që kemi”, tha Asselborn.
Ndërkohë, ministrja gjermane e Punëve të Jashtme, Annalena Baerbock, tha se sanksionet e reja të BE-së duhet të konsiderohen si sinjal i qartë për qeverinë e Teheranit për “shtypjen brutale të sigurisë ndaj protestuesve pro-lirisë”.
“Ne po i dërgojmë një sinjal të ri dhe të pagabueshëm regjimit iranian, të drejtat e njeriut janë gjë e pandashme”, tha Baerbock më herët gjatë ditës në Bruksel.
Ajo tha se sanksionet e reja synojnë veçanërisht rrethin e brendshëm të pushtetit të Gardës Revolucionare dhe strukturat që i financojnë ato.
“Po punojmë edhe për masa të mëtejshme. Nuk ka të bëjë vetëm me leximin e deklaratave politike. Në mënyrë që sanksionet të jenë ligjërisht të sigurta, është i nevojshëm ekzaminimi intensiv”, tha Baerbock, duke shtuar se situata ligjore ishte “jashtëzakonisht e ndërlikuar”.
Ajo gjithashtu theksoi se sa e rëndësishme është që Gjermania, së bashku me 16 vende të tjera, e kanë vënë situatën në Iran në agjendën e Këshillit të OKB-së për të Drejtat e Njeriut në Gjenevë.
Takimi i Këshillit të OKB-së për të Drejtat e Njeriut është planifikuar të mbahet gjatë javës së ardhshme.
47 vendet anëtare të këshillit nuk mund të vendosin sanksione, por mund të miratojnë një rezolutë që dënon dhunën, si dhe të vendosin për një mekanizëm për të hetuar situatën nga afër.
