“Asnjë agjenci tjetër nuk mund të krahasohet” me shkallën e saj të ndihmës, tha Tedros Adhanom Ghebreyesus
Shefi i Organizatës Botërore të Shëndetësisë (OBSH), Tedros Adhanom Ghebreyesus, përsëriti se ndalimi i agjencisë së OKB-së për refugjatët palestinezë (UNRWA) “vetëm do të thellojë” vuajtjet e njerëzve në Gaza pasi “asnjë agjenci tjetër nuk mund të krahasohet” me shkallën e saj të ndihmës, transmeton Anadolu.
“UNRWA është ofruesi më i madh i shërbimeve shëndetësore në Gaza”, tha Tedros në X.
“Me rreth 1.000 punonjës shëndetësorë, UNRWA menaxhon mbi 16.000 konsultime mjekësore në ditë, duke përfshirë vaksinimet e fëmijërisë, shërbimet e shëndetit amënor, skriningun e kequshqyerjes dhe mbështetjen e shëndetit mendor”, shtoi ai.
“Asnjë agjenci tjetër nuk mund të krahasohet me këtë shkallë. Ndalimi i UNRWA-s vetëm do të thellojë vuajtjet e njerëzve që kanë nevojë për kujdes jetëshpëtues”, tha Tedros.
Komentet e tij erdhën pasi shefi i UNRWA-s, Philippe Lazzarini, tha të mërkurën se agjencia është tri javë larg afatit të ndalesës nga parlamenti izraelit për agjencinë e OKB-së.
“Nëse zbatohet, vendimi do të ketë një ndikim katastrofik për njerëzit që mbështesim”, tha Lazzarini në X, duke nënvizuar se agjencitë e tjera të OKB-së tashmë kanë pranuar se “nuk mund të mbushin boshllëkun” e UNRWA-s.
Ai kujtoi se në mungesë të UNRWA-s, përgjegjësia për t’u ofruar ndihmë nevojtarëve bie mbi Izraelin si fuqi pushtuese.
Parlamenti izraelit, Knesset, votoi tetorin e kaluar për të ndaluar operacionet e UNRWA-s në zonat nën kontrollin izraelit, duke përmendur pretendime se disa punonjës të agjencisë ishin të përfshirë në sulmin ndërkufitar ndaj Izraelit nga grupi palestinez Hamas më 7 tetor 2023, një akuzë agjencia e mohon.
Nëse zbatohet, ndalimi do të çonte në mbylljen e zyrave të UNRWA-s dhe ngrirjen e llogarive të saj financiare në Izrael, duke ndalur efektivisht operacionet e saj.
E themeluar në vitin 1949, UNRWA ka qenë një mjet jetësor për refugjatët palestinezë, duke ofruar shërbime për gati 5,9 milionë njerëz në gjithë Gazën, Bregun Perëndimor, Jordani, Siri dhe Liban.
