“Ne do të takohemi në fillim të javës së ardhshme në Türkiye për të diskutuar se çfarë do të thotë ky zhvillim për rajonin dhe më gjerë”, njoftoi von der Leyen
Presidentja e Komisionit të BE-së, Ursula von der Leyen, ka bërë të ditur se do të vizitojë Türkiyen për të diskutuar mbi zhvillimet e fundit në Siri pas rënies së regjimit të Bashar Asadit, transmeton Anadolu.
Në platformën sociale X, von der Leyen njoftoi se ajo diskutoi gjerësisht me presidentin turk, Recep Tayyip Erdoğan, zhvillimet e fundit në Siri.
“Ne do të takohemi (me presidentin Erdoğan) në fillim të javës së ardhshme në Türkiye për të diskutuar se çfarë do të thotë ky zhvillim për rajonin dhe më gjerë”, njoftoi von der Leyen.
Ajo nuk dha detaje të tjera për vizitën, por theksoi se “integriteti territorial i Sirisë duhet të ruhet dhe minoritetet të mbrohen”.
Pas shpërthimit të përleshjeve të 27 nëntorit midis grupeve kundër regjimit dhe forcave të regjimit sirian, Asadi dhe familja e tij të dielën u larguan në Rusi pasi grupet kundër regjimit morën kontrollin e kryeqytetit Damask, duke shënuar rënien e regjimit të Partisë Baath, e cila ka qenë në pushtet në Siri që nga viti 1963.
