Shërbimi i Jashtëm i Inteligjencës ruse (SVR) ka publikuar një video në gjuhën angleze, ku u bën thirrje qytetarëve të SHBA-së që t’u bashkohen, si një përgjigje e drejtpërdrejtë ndaj përpjekjeve të CIA-s amerikane për të “rekrutuar” rusë për bashkëpunim.
Sipas Reuters, CIA ka intensifikuar përpjekjet për të rekrutuar shtetas rusë që nga fillimi i pushtimit rus të Ukrainës në vitin 2022 dhe shpesh publikon video në gjuhën ruse për të inkurajuar qytetarët e këtij vendi për bashkëpunim.
Si përgjigje ndaj këtyre përpjekjeve, SVR ka publikuar një video në anglisht, duke ftuar qytetarët amerikanë për bashkëpunim.
Videoja synon kryesisht të tallet me përpjekjet e CIA-s për të rekrutuar rusë, por gjithashtu përmban pamje nga Lufta e Dytë Botërore, ku shfaqen ushtarë sovjetikë dhe amerikanë të përqafuar.
“Jemi të bindur se përpjekjet shkatërrimtare të CIA-s nuk do të kenë sukses dhe se rusët dhe amerikanët nuk e kanë harruar historinë madhështore të luftës së përbashkët kundër nazizmit. Në videon tonë, mund të shihni të kaluarën tonë të lavdishme, por edhe ide për të ardhmen,” thuhet në deklaratën e SVR-së.
Në fund, amerikanëve u është përcjellë mesazhi se mund t’i kontaktojnë “në mënyrë të sigurt” përmes shfletuesit TOR, i cili lejon komunikim anonim.
Përndryshe, SVR ka pasur më parë agjentë të saj të infiltruar thellë në administratat amerikane. Disa nga shembujt më të njohur janë Julius Rosenberg, i cili i dërgonte Bashkimit Sovjetik informacione sekrete mbi programin bërthamor amerikan, si dhe Robert Hanssen dhe Aldrich Ames, të cilët gjatë Luftës së Ftohtë i dërguan Moskës mijëra sekrete amerikane.
