Kompleksi luksoz i apartamenteve të Ivana Trump në Nju Jork, i cili është i “mbuluar” me ar, shitet për 26.5 milionë dollarë.
Ajo e bleu atë në vitin 1992, pas divorcit nga Donald Trump. Kompleksi rezidencial ka gjashtë kate. Është bërë në vitin 1879.
“Mamasë sime i pëlqente absolutisht të jetonte këtu,” tha djali i saj Eric.
Këtu ka deri në 17 dhoma, nga të cilat pesë janë dhoma gjumi dhe pesë janë banjo. Çdo dhomë është e dekoruar me ar. Në librin “Raising Trump”, të cilin e botoi në vitin 2017, Ivana e përshkruan dhomën e ndenjes si “një vend ku Louis XVI do të jetonte nëse do të kishte para”.
Duke qenë se ky kompleks është mjaft i vjetër, agjentët e shitjeve deklaruan në një intervistë për New York Post se blerësi me siguri do të rinovojë gjithçka, por se Ivana nuk kishte dëshirë ta bënte këtë pasi i pëlqente kitsch-i.
Për kujtim, Ivana vdiq në korrik të këtij viti nga plagët e marra nga rrëzimi nga shkallët.