Më shumë se 27 vjet pas vdekjes së princeshës Diana, ish-shoferi i saj Steve Davies dha intervistën e tij të parë, ku foli për diçka që e ka përndjekur që atëherë.
Gazetari i BBC-së, Martin Bashir, i dha fund karrierës mbretërore të shoferit personal të Dianës, Daviesit. Megjithatë, duhej të kalonte një çerek shekulli për ta zbuluar këtë, dhe të vërtetën e mësoi rastësisht nga një episod i “Kronës”.
Shoferi u pushua nga puna në fund të vitit 1995 pa asnjë shpjegim.
“Kjo ndodhi brenda natës. M’u ndalua të ngisja makinën e saj. Pas pushimit të Krishtlindjeve, më thanë se ajo nuk dëshironte të isha afër saj, nuk më lejuan as ta pastroja makinën e saj. Ende isha në listën e pagesave të saj, por gjithçka që mund të bëja ishte të ulesha në garazh për dhjetë orë në ditë, në turn zyrtar, pa bërë asgjë, dhe më pas të shkoja në shtëpi. Isha i thyer, i poshtëruar. Ajo më shmangte,” tha ai.
Ai nuk e dinte atëherë, por ishte viktimë anësore e komplotit korruptiv të Bashirit, i cili e çoi princeshën në intervistën më të vështirë në historinë e familjes mbretërore, paraqitjen e saj në emisionin “Panorama” në nëntor 1995.
Në një takim të fshehtë me princeshën dhe vëllanë e saj Charles Spencer në shtator të atij viti, Bashir pretendoi se miqtë dhe bashkëpunëtorët e afërt të Dianës ishin pjesë e një komploti shtetëror kundër saj. Gazetari e identifikoi veçanërisht Steve-in si një spiun për një gazetë dhe e paralajmëroi Dianën se makina e saj po monitorohej dhe përgjohej.
“Për pasojë, u detyrova të largohem nga puna që doja ta bëja deri në fund të jetës sime. Shërbimi mbretëror do të thotë të kesh besim dhe të jesh i përkushtuar, të tregosh diskrecion dhe të kesh ndjenjën e detyrës,” theksoi ai.
Më pas, ai shprehu se çfarë e shqetëson më shumë tani.
“Nuk jam njeri që humb kohë dhe energji në zemërim apo urrejtje, por ajo vdiq duke besuar se e kisha tradhtuar dhe kjo është diçka që nuk mund ta harroj ose fal kurrë,” tha ai.
Princesha Diana humbi jetën tragjikisht në një aksident automobilistik në Paris më 31 gusht 1997. Davies beson se princesha Diana do të ishte ende gjallë po të kishte qenë ai në timon atë natë fatale.
“Besoj se Diana do të ishte gjallë sot nëse do ta kisha vozitur unë në Paris. Nuk do të kisha lejuar kurrë që gjërat të ndodhnin ashtu siç ndodhën atë natë. Gjithmonë merrja masa shtesë kur bëhej fjalë për sigurinë e saj. E kam vozitur në situata të ndryshme dhe gjithmonë kujdesesha për çdo detaj. Insistoja gjithmonë në rripin e sigurisë dhe kontrolloja me kujdes çdo kusht para se të niseshim diku me makinë,” përfundoi ai.
