Roma italiane këtë mëngjes ka marrë një vendim krejtësisht të papritur për të shkarkuar trajnerin e saj, Daniele De Rossi, legjendën e klubit nga stadiumi Olimpico.
De Rossi mbërriti në stolin e Romës në janar të këtij viti nga skuadra e kategorisë së dytë SPAL, projekti me të në krye të ekipit u prezantua si një afatgjatë dhe kohët e fundit mesfushori legjendar kishte nënshkruar një kontratë të re.
Ai arriti të çojë Romën në vendin e gjashtë sezonin e kaluar, humbi kualifikimin për Ligën e Kampionëve, por mbeti në stolin e trajnerit për shkak të përparimit të ekipit dhe më 25 qershor nënshkroi zgjatjen e bashkëpunimit.
Megjithatë, këtë mëngjes Roma vendosi të shkarkojë De Rossin pas vetëm katër ndeshjeve në sezonin e ri të Serisë A, ku ekipi regjistroi tre barazime dhe një humbje.
“Danieleu, i cili gjithmonë do të jetë i mirëpritur në klub si në shtëpi, i falënderojmë me zemër për punën e bërë me pasion dhe përkushtim gjatë muajve të fundit,” njoftoi Roma.
De Rossi është një nga legjendat më të mëdha të Romës në historinë e klubit, pasi ai e kaloi pothuajse gjithë karrierën e tij me fanellën e Romës.
Ai e la ekipin ku u rrit vetëm në moshën 36-vjeçare, kur nuk iu rinovua kontrata, dhe u transferua te Boca Juniors, ku pas një viti lojë vendosi të varë këpucët.
Si futbollist, De Rossi ka bërë 616 paraqitje për Romën, ka shënuar 63 gola dhe ka 61 asistime.
