Në vitin që kur filloi pushtimi i plotë i Ukrainës nga Rusia, Moska është goditur nga sanksione të pashembullta perëndimore dhe është shkëputur nga pjesa më e madhe e ekonomisë globale. Megjithatë, Kina ka thënë se nuk ka “kufizime” për miqësinë e saj me Rusinë.
Kina “hodhi një litar shpëtimi ekonomik” për Rusinë dhe kështu zbuti pasojat e sanksioneve. Ekzistojnë tre mënyra kryesore në të cilat Kina ka mbështetur ekonominë ruse: duke blerë energji ruse, duke zëvendësuar furnizuesit perëndimorë dhe duke ofruar një alternativë ndaj dollarit amerikan.
Blerja e produkteve ruse të energjisë
Tregtia totale midis Kinës dhe Rusisë arriti një rekord të ri në vitin 2022, duke u rritur me 30 për qind në 190 miliardë dollarë, sipas të dhënave të Doganës së Kinës.
Në veçanti, tregtia e energjisë është rritur ndjeshëm që nga fillimi i luftës. Nga marsi në dhjetor, Kina bleu 50.6 miliardë dollarë naftë bruto nga Rusia, që është 45 për qind më shumë se në të njëjtën periudhë të vitit të kaluar. Importet e qymyrit u rritën me 54 për qind në 10 miliardë dollarë. Blerjet e gazit natyror, duke përfshirë gazin e tubacionit dhe LNG, u rritën 155 për qind në 9.6 miliardë dollarë.
Zëvendësimi i furnitorëve perëndimorë
Rusia ka shpenzuar gjithashtu miliarda duke blerë makineri, elektronikë, metale bazë, automjete, anije dhe avionë nga Kina, siç detajohet në një raport nga Shërbimi Kërkimor i Kongresit të SHBA majin e kaluar.
Markat kineze të makinave, duke përfshirë Havel, Chery dhe Geely, panë rritjen e pjesës së tyre të tregut nga 10 përqind në 38 përqind në vitin pas largimit të markave perëndimore, sipas të dhënave më të fundit nga firma kërkimore ruse Autostat.
Në elektronikën e konsumit, markat kineze përbënin rreth 40 për qind të tregut të smartfonëve në fund të vitit 2021. Një vit më vonë, ato praktikisht morën industrinë me 95 për qind të tregut, sipas firmës së kërkimit të tregut Counterpoint.
Krijimi i një alternative për dollarin amerikan
Pasi disa bankave ruse iu ndërprenë aksesi SWIFT, sistemi ndërkombëtar i mesazheve që mundëson transaksionet bankare, Moska e ndërroi dollarin me juanin kinez.
Kompanitë ruse po përdorin më shumë juanë për të lehtësuar rritjen e tregtisë me Kinën. Pjesa e juanit në tregun valutor të Rusisë është rritur në 48 për qind deri në nëntor 2022 nga më pak se 1 për qind në janar, sipas mediave ruse, duke cituar kreun e Bursës së Moskës.
