Anëtari i Senatit Amerikan nga Partia Demokratike, Cory Booker, tashmë prej 17 orësh po mban fjalim në dhomën e sipërme të Kongresit të SHBA-ve, dhe ka deklaruar se “do të vazhdojë derisa të rrëzohet”.
Fjalimi i Booker-it ka hyrë në orën e 18-të, me vetëm disa pauza të shkurtra, por siç raportojnë mediat amerikane, edhe gjatë atyre momenteve ai nuk është ulur fare.
Nëse vazhdon të flasë edhe pak më shumë se gjashtë orë, Booker do të bëhet “mbajtësi” i fjalimit më të gjatë në historinë e Senatit, duke kaluar kështu Strom Thurmond-in.
Thurmond kishte folur për plot 24 orë e 18 minuta, në përpjekje për të shtyrë votimin për një ligj që do t’u jepte afrikano-amerikanëve të drejta të barabarta me të bardhët në Amerikë.
Megjithatë, fjalimi i Booker-it nuk ka për qëllim të ndalojë një votim të caktuar, prandaj në këtë aspekt është fjalimi më i gjatë ndonjëherë në historinë e Senatit.
Booker e nisi fjalimin me njoftimin se “do të zgjasë për sa kohë ai mund të qëndrojë fizikisht në këmbë” dhe gjatë 17 orëve të kaluara ka folur për dy muajt e parë të administratës së Donald Trump-it.
Duke qenë se fjalimet në Senat nuk kanë kufizim kohor, seanca nuk mund të përfundojë zyrtarisht pa përfunduar fjalimet e të gjithë senatorëve që janë paraqitur për të folur.
Fjalimi i Booker-it është ndërprerë herë pas here kur ai pranonte pyetje nga kolegët e tij, por asnjëherë nuk ka kërkuar të largohet nga foltorja./Gazetaere
