– Po ashtu një shumicë e qartë, respektivisht 58 për qind, thanë se ata mendojnë se politikat e presidentit amerikan do të nxisin inflacionin
ANKARA/ISTANBUL (AA) – Sipas një sondazhi të fundit, 58 për qind e amerikanëve besojnë se politika agresive tarifore e presidentit Donald Trump do të dëmtojë ekonominë amerikane, transmeton Anadolu.
Sondazhi i realizuar nga Shkolla Juridike Marquette vlerësoi ndikimin në publik të vendimeve të Trumpit gjatë mandatit të tij të dytë në Shtëpinë e Bardhë, që filloi më 20 janar, i ndjekur nga një valë vendimesh gjithëpërfshirëse dhe ndonjëherë edhe radikale.
Sipas rezultateve të sondazhit, 58 për qind e amerikanëve besojnë se tarifat e shpallura nga Trumpi do të dëmtojnë ekonominë amerikane ndërsa 28 për qind mendojnë se do të jenë të dobishme.
Po ashtu një shumicë e qartë, respektivisht 58 për qind, thanë se ata mendojnë se politikat e presidentit amerikan do të nxisin inflacionin.
Ndër të tjera, sondazhi zbuloi se 43 për qind e amerikanëve kanë opinion negativ për Trumpin ndërsa 64 për qind besojnë se mbyllja e institucioneve është përtej autoritetit të presidentit, pas një sërë masash nga Trumpi dhe ndihmësit e tij për të mbyllur Departamentin e Arsimit dhe USAID-in.
Gjithashtu 70 për qind e të anketuarve thanë se gjyqtarët që vendosin kundër vendimeve të Trumpit nuk duhet të hiqen. Dje, Trump njoftoi se SHBA-ja do të vendosë tarifa reciproke ndaj vendeve të tjera, me një tarifë bazë të vendosur prej 10 për qind.
Që nga fillimi i mandatit të tij të dytë, urdhrat ekzekutiv të Trumpit shpesh janë kundërshtuar në gjykatë, me shumë gjyqtarë federalë që kanë nxjerrë vendime për të pezulluar ose përmbysur këto politika.
Shumë prej këtyre çështjeve pritet të përfundojnë në Gjykatën e Lartë të SHBA-së, e cila ka një shumicë gjyqtarësh konservatorë të emëruar nga presidentë nga republikanët, partia e Trumpit. Megjithatë, gjyqtarët jo gjithmonë votojnë në përputhje me shtrirjen e tyre të perceptuar.
