Shumica e të anketuarve, pa marrë parasysh preferencat politike, kanë dyshim tek Putini, por me një hendek të madh
Shumica e madhe e votuesve amerikanë thonë se nuk duhet t’i besohet presidentit rus Vladimir Putin, transmeton Anadolu.
Gjithsej 81 për qind e votuesve amerikanë nuk e shohin udhëheqësin rus si të besueshëm, tha një sondazh i Universitetit Quinnipiac të publikuar dje, bazuar në një sondazh mbarëkombëtar me 1.039 të anketuar.
Shumica e të anketuarve, pa marrë parasysh preferencat politike, kanë dyshim tek Putini, por me një hendek të madh: 93 për qind e votuesve demokratë besojnë se SHBA nuk duhet t’i besojë Putinit, ndërsa 73 për qind e votuesve republikanë ndajnë këtë mendim.
Vetëm 9 për qind e të anketuarve thanë se Putinit mund t’i besohej, ndërsa 10 për qind nuk dhanë një opinion.
Sondazhi ndodh rreth një muaj pasi presidenti amerikan Donald Trump u kthye në Shtëpinë e Bardhë. Gjatë mandatit të tij të parë, në vitet 2017-2021, Trump shihej gjerësisht si pro-rus dhe përpjekjet e tij të fundit për lidhje më të ngushta me Moskën tregon se edhe në mandatin e tij të dytë vazhdon kjo prirje.
Në sondazh, 40 për qind e pjesëmarrësve shprehën miratimin e qëndrimit të Trumpit për luftën Rusi-Ukrainë, 44 për qind nuk e miratuan atë, ndërsa 16 për qind nuk dhanë një opinion.
Sondazhi u krye përpara komenteve të Trumpit këtë javë, në të cilat ai fajësoi Ukrainën për shpërthimin e luftës. Megjithatë, për vite me radhë, Trump ka bërë presion për një fund të shpejtë të luftës dhe madje u zotua t’i japë fund asaj menjëherë pas marrjes së detyrës.
Disa analistë kanë shprehur shqetësime se përfundimi i luftës shumë shpejt do të ishte shpërblim për Rusinë, me lëshime territoriale në Ukrainën lindore, që në masë të madhe kontrollohet nga forcat ruse.
