“Falë nivelit shumë të lartë të vaksinimit, situata jonë epidemiologjike është e favorshme”, tha ministrja e Shëndetësisë
Ministrja spanjolle e Shëndetësisë njoftoi se vendi i saj planifikon të heqë detyrimin e mbajtjes së maskave në ambiente të mbyllura më 20 prill, raporton Anadolu Agency (AA).
“Falë nivelit shumë të lartë të vaksinimit, situata jonë epidemiologjike është e favorshme”, tha Carolina Darias për shtypin.
Kjo do të jetë hera e parë që nga pranvera e vitit 2020 që njerëzit në Spanjë do të mund të heqin maskat në hapësirat e brendshme.
Ndryshe nga vendet e tjera, përdorimi i maskave në ambiente të mbyllura nuk ka qenë çështje politikisht polarizuese në Spanjë. Edhe pse nuk kërkohet më ligjërisht, një përqindje e madhe e njerëzve vazhdojnë të mbajnë maska edhe jashtë.
Në fillim të pandemisë, Spanja ishte një nga vendet më të goditura dhe që atëherë është përballur me disa valë shkatërruese.
Ministria e Shëndetësisë ka raportuar 102.747 vdekje nga sëmundja infektive, megjithëse numri i vërtetë mendohet të jetë më i lartë për shkak të raportimit të pamjaftueshëm në fillim të pandemisë.
Por me 92 për qind të popullsisë më të vjetër se 12 vjeç që kanë marrë të dyja dozat e vaksinës dhe vetëm 4 për qind të shtretërve spitalorë të zënë nga pacientët me COVID-19, qeveria beson se është koha e duhur për të bërë një kthim pothuajse të plotë në normalitetin para pandemisë.
Muajin e kaluar, Spanja hoqi nevojën e karantinës për personat me simptoma të buta. Në shkurt, vendi hoqi gjithashtu detyrimin e maskave në hapësira të jashtme.
Megjithatë, shkalla e infeksionit në vend mbetet relativisht e lartë. Më shumë se 400 në çdo 100.000 të rritur mbi 60 vjeç kanë rezultuar pozitivë në virusin në dy javët e fundit.
