Gjyqi për mashtrim fiskal ndaj trajnerit të futbollit Carlo Ancelotti filloi sot në Spanjë, me akuzat për shmangie të taksave prej 1 milion eurosh gjatë periudhës së tij të parë te Real Madridi, transmeton Anadolu.
Trajneri italian, 65 vjeç, përballet me dy akuza për evazion fiskal në lidhje me vitet tatimore 2014 dhe 2015.
Prokurorët po kërkojnë një dënim me burg prej gati pesë vjetësh, së bashku me një gjobë prej 3,2 milionë eurosh. Ata pretendojnë se Ancelotti nuk ka raportuar të ardhurat nga të drejtat e tij të imazhit, duke deklaruar vetëm pagën e tij nga Madridi.
Gjyqi është caktuar të zgjasë tri ditë, me një zgjidhje jashtëgjyqësore ende të mundshme në çdo moment të procesit. Përpara seancës, prokurorët konfirmuan se autoriteti tatimor i Spanjës ka sekuestruar nga Ancelotti shumën e borxhit, plus interesin.
Trajneri i Real Madridit ka mohuar akuzat dhe ka shprehur besim në sistemin gjyqësor spanjoll, duke thënë javën e kaluar se mezi pret të dëshmojë në gjykatë.
Ancelotti ka një rekord të jashtëzakonshëm në futboll, pasi ka udhëhequr skuadra drejt titullit e Ligës së Kampionëve pesë herë – dy herë me AC Milanin dhe tri herë me Real Madridin.
Ai gjithashtu dallohet si trajneri i vetëm që ka fituar tituj të ligës vendase në pesë vende të mëdha evropiane: Angli, Spanjë, Itali, Gjermani dhe Francë.
Ancelotti është ylli i fundit i futbollit nën hetim nga autoritetet tatimore spanjolle për mashtrim të dyshuar fiskal, pas rasteve të profilit të lartë, si ato të lojtarëve Cristiano Ronaldo dhe Lionel Messi, shumë prej të cilave janë zgjidhur jashtë gjykatës me gjoba të mëdha.
