Pasi legjenda e boksit amerikan Mike Tyson fitoi titullin WBC në vitin 1986 me fitoren ndaj Trevor Berbick-ut, ai pyeti Rory Holloway-n që të bëhej menaxheri i tij ndërsa ishin në hollin e një hoteli në Las Vegas. Megjithatë, pak kohë më parë kishte refuzuar një ofertë për t’u shfaqur në një film të njohur.
Bëhet fjalë për filmin “Rocky,” ku luante Sylvester Stallone, por Tyson ishte i vendosur të fokusohej te karriera e tij në boks dhe nuk kishte interes për Hollywood-in.
“Ne po flisnim në holl pasi u bë kampion, dhe atëherë na u afrua Stallone. Ai i tha: ‘Hej Mike, luftë e shkëlqyer, të përgëzoj… ndoshta mund të flasim për një paraqitje në filmin e ardhshëm Rocky’. Mike e shikoi dhe iu përgjigj me indiferencë: ‘Mund të të pyes diçka? Do të më rrahësh në atë film?’ Stallone iu përgjigj: ‘Po, filmi është për Rocky-n’. Pas kësaj Mike i tha: ‘Jo, nuk do të të lejoja të më rrihje as për shaka’. Mendova se ishte çmenduri,” tregoi Holloway për SunSport.
Duke kujtuar kohën me Tyson-in, Holloway tha se ishte “plotësisht kaotike” të ishte menaxher i tij. Ai shtoi se duhej të përshtatej vazhdimisht me personalitetin e paparashikueshëm të Tyson-it dhe ngritjen e tij të shpejtë drejt famës.
“Në atë kohë ekzistonin tre Mike: Jordan, Jackson dhe Tyson. Nga të tre, mendoj se Michael Jackson dhe Mike Tyson ishin fenomene globale. Tyson ishte një i ri me një të kaluar specifike që tërhoqi vëmendje të madhe nga publiku. Nuk mund të shkoje askund me të. Kudo që shfaqeshim, koha ndalej. Në Harlem mbyllnin dyqanet kur vinim ne, sepse mijëra njerëz donin ta shihnin. Ajo famë ia vështirësoi jetën, donte të ishte normal, por nuk mundej. Ndonjëherë ai ishte armiku më i keq i vetvetes. Ishte e vështirë, por njëkohësisht një nder dhe kënaqësi. Mike e kishte të vështirë, ashtu si edhe unë. Përpiqesha ta mbroja. Sa më shumë para fitonte, aq më e vështirë bëhej. Dhe Mike ishte impulsiv në atë kohë. Mund të bënim plane, por vlerësoheshin vetëm dy minutat e ardhshme. Isha miku i tij më i afërt, por njëkohësisht menaxheri që kujdesej për karrierën e tij. Ndonjëherë ishte e vështirë sepse kufijtë ishin të mjegullt, dhe sa më shumë që kalonte koha, aq më pak të qarta bëheshin ato. Gjithmonë kam ndier se detyra ime ishte ta mbroja, por ndonjëherë nuk mund t’i mbroni njerëzit nga vetja e tyre,” përfundoi Holloway.
Megjithëse është në pension prej kohësh, Tyson do të zhvillojë një ndeshje boksi kundër Jake Paul-it, një kundërshtar shumë më i ri.
