Sipas studimit, rritja e temperaturave do të reduktojë ndjeshëm tokën globale të disponueshme për kulturat kryesore si orizi, misri, gruri, patatet dhe soja, të cilat furnizojnë mbi dy të tretat e energjisë ushqimore në botë
Ndryshimet klimatike dhe rritja e temperaturave mund të kërcënojnë deri në një të tretën e prodhimit global të ushqimit, transmeton Anadolu.
Studiuesit e Universitetit Aalto në Finlandë në studimin e botuar së fundmi në ‘Nature Food’ analizuan ndikimin e ndryshimeve të ardhshme në temperaturë, reshje dhe thatësi në kushtet e zhvillimit të 30 kulturave kryesore ushqimore në mbarë botën.
Sipas studimit, rritja e temperaturave do të reduktojë ndjeshëm tokën globale të disponueshme për kulturat kryesore si orizi, misri, gruri, patatet dhe soja, të cilat furnizojnë mbi dy të tretat e energjisë ushqimore në botë.
Rajonet me gjerësi të ulët gjeografike do të pësojnë ndikime shumë më të këqija se rajonet me gjerësi të mesme ose të lartë.
Me nivele të ndryshme të ngrohjes, gjysma e prodhimit bimor në këto zona mund të jetë në rrezik pasi kushtet klimatike po kthehen në të pafavorshme, duke çuar në një rënie të ndjeshme të diversitetit të të korrave.
Sara Heikonen, studiuesja e doktoraturës që udhëhoqi studimin, theksoi se humbja e diversitetit të të korrave do të reduktojë në mënyrë drastike gamën e ushqimit të disponueshëm për kultivim, duke shtuar se “kjo do të reduktonte sigurinë ushqimore dhe do ta bënte më të vështirë marrjen e kalorive dhe proteinave të mjaftueshme”.
“Të mbjellat me rrënjë tropikale, si për shembull ‘yam’-i, që janë kyçe për sigurinë ushqimore në rajonet me të ardhura të ulëta, si dhe drithërat janë veçanërisht të prekshme. Në Afrikën sub-sahariane, rajoni që do të ndikohej më shumë, pothuajse tre të katërtat e prodhimit aktual është në rrezik nëse ngrohja globale kalon 3 gradë Celsius”, tha Heikonen.
Në të kundërtën, rajonet me gjerësi të mesme dhe të lartë pritet të ruajnë tokën prodhuese dhe të rrisin diversitetin e të korrave, me kultura si dardha që mund të rriten në zonat veriore.
“Nëse duam të sigurojmë sistemin tonë ushqimor në të ardhmen, ne duhet të zbusim ndryshimin e klimës dhe të përshtatemi me efektet e saj. Edhe nëse ndryshimet më të mëdha janë në rajonet ekuatoriale, ne të gjithë do t’i ndjejmë efektet përmes sistemit të globalizuar të ushqimit. Ne duhet të veprojmë së bashku për të adresuar këto probleme”, tha Heikonen.
Matti Kummu, autori i lartë i studimit, theksoi se derisa kushtet klimatike mund të jenë të favorshme, ngrohja mund të sjellë dëmtues të rinj dhe mot ekstrem, të cilat ende mund të prishin bujqësinë duke e bërë situatën më komplekse.
