“Ne mbështesim punën e gjykatës, jemi në anën e gjykatës, por unë nuk ndërhyj në vendimet konkrete”, tha kryeministri suedez, Ulf Kristersson
Kryeministri suedez Ulf Kristersson tha se vendi i tij mbështet urdhër-arrestin e Gjykatës Ndërkombëtare Penale (GJNP) për kryeministrin izraelit Benjamin Netanyahu, raporton Anadolu.
Në një konferencë për media, Kristersson tha se do të takohet me liderët e vendeve të NATO-s, përfshirë Finlandën, Danimarkën, Norvegjinë dhe Poloninë, për një seancë pune dyditore në Suedi.
Në përgjigje të pyetjes së Anadolu-s nëse Netanyahu do të arrestohej nëse vinte në Suedi, Kristersson tha: “Ne mbështesim punën e gjykatës, jemi në anën e gjykatës, por unë nuk ndërhyj në vendimet konkrete”.
Të enjten, GJNP lëshoi urdhër-arrest për Netanyahun dhe ish-ministrin e Mbrojtjes, Yoav Gallant për krime lufte dhe krime kundër njerëzimit në Gaza.
Izraeli ka vrarë më shumë se 44 mijë palestinezë, shumica prej tyre gra dhe fëmijë që nga sulmet e Hamasit të 7 tetorit 2023, si dhe ka shkaktuar shkatërrim të gjerë dhe kushte urie në të gjithë enklavën.
– Komente rreth anijes kineze në Detin Baltik
Kristersson komentoi gjithashtu incidentin që përfshinte anijen transportuese kineze me shumicë “Yi Peng 3”, e cila dyshohet se është përfshirë në dëmtimin e kabllove të telekomunikacionit nënujor që lidhin Finlandën, Gjermaninë, Suedinë dhe Lituaninë në Detin Baltik.
“Ne duam që anija kineze të lëvizë drejt ujërave suedeze”, tha ai, duke shtuar se kjo do të mundësonte bashkëpunim të lehtë për të zbuluar atë që po ndodh në rajon.
Më 18 nëntor një defekt u zbulua në një kabllo telekomunikacioni midis Lituanisë dhe Suedisë.
Përpos kësaj, kompania finlandeze “Cinia” raportoi një mosfunksionim të sistemit dhe ndërprerje të shërbimeve më 19 nëntor për shkak të një ndërprerjeje në kabllon nënujore midis Finlandës dhe Gjermanisë.
Raportet e lajmeve sugjeruan se transportuesi me flamur kinez “Yi Peng 3” ishte afër vendndodhjeve të kabllove në të dyja momentet kur ndodhi dëmtimi.
