Njoftohet se shefi i sigurimit të ambasadës ka humbur jetën ndërsa 2 roje janë plagosur.
Ministria e Punëve të Jashtme të Azerbajxhanit njoftoi se është kryer sulm i armatosur ndaj ambasadës së saj në kryeqytetin e Iranit, Teheran, ku humbi jetën shefi i sigurimit, transmeton Anadolu Agency (AA).
Në deklaratën nga ministria raportohet se rreth orës 08:30 është kryer sulm i armatosur ndaj ambasadës së Azerbajxhanit në Teheran.
Në deklaratë thuhet se sulmuesi, i cili hapi zjarr me automatik kallashnikov, vrau shefin e sigurimit të ambasadës dhe plagosi 2 roje.
Theksohet se hetimet për sulmin po vazhdojnë dhe publikut do t’i jepet informacion shtesë për detajet.
Komandanti i Policisë së Teheranit, Hossein Rahimi tha se është kapur sulmuesi, i cili kreu sulm të armatosur ndaj Ambasadës së Republikës së Azerbajxhanit në Teheran.
Sulm i armatosur ndaj ambasadës së Azerbajxhanit në Teheran, një i vdekur https://t.co/F6wrhwdZbD pic.twitter.com/mKTtUGKyD7
— ANADOLU AGENCY (AL) (@aa_albanian) January 27, 2023
Sipas agjencisë së lajmeve Fars, Rahimi ka dhënë informacione për sulmin e armatosur që ndodhi në Teheran sot në mëngjes.
Ai tha se “një person ka kryer sulm të armatosur gjatë hyrjes së stafit të Ambasadës së Azerbajxhanit në ambasadë, duke shkaktuar 1 të vdekur dhe 2 të plagosur”.
Duke theksuar se sulmuesi është kapur, Rahimi tha se “Sulmuesi ka hyrë në objekt me 2 fëmijë të vegjël. Sipas informacioneve të para është konstatuar se sulmin e ka organizuar për shkak të problemeve personale dhe familjare”.
Rahimi nuk ka dhënë informacione për identitetin e sulmuesit.