Portali rus Sputnjik, edicioni në gjuhën serbe, mëngjesin e sotëm për pak kohë publikoi, e më pas e tërhoqi me shpejtësi një artikull në të cilin pretendohej se presidentit të entitetit të Bosnje dhe Hercegovinës, Republika Srpska, Milorad Dodik, i ishte miratuar shtetësia dhe qëndrimi në Federatën Ruse.
Edhe pse lajmi tashmë nuk mund të gjendet në portal, përdoruesit që kanë tentuar ta hapin lidhjen kanë hasur në mesazhin e njohur të internetit: “404: Faqja është hequr”. Megjithatë, vetë adresa e faqes sugjeron qartë se lajmi ishte publikuar përpara se të fshihej, gjë që ka ngjallur shumë pyetje nëse bëhej fjalë për një shaka të 1 prillit apo për një lajm të vërtetë që “rrëshqiti” në publik.
Dodik mbrëmë u paraqit përmes rrjetit social X, ku publikoi një video duke thënë se ndodhet në Moskë dhe njoftoi kthimin në kryeqytetin rus më 9 maj. Vendndodhja e tij ka qenë e panjohur që prej kthimit nga Izraeli, ku qëndroi javën e kaluar, por që për shkak të padëshirueshmërisë u detyrua të largohej me urgjencë nga ai vend. Vetëm mbrëmë, me paraqitjen nga Moska, u bë e qartë se ku ndodhet.
Kujtojmë se Gjykata e Bosnje dhe Hercegovinës më parë kishte caktuar paraburgim për Dodikun, kryeministrin e Republikës Srpska Radovan Višković dhe kryetarin e Kuvendit Popullor Nenad Stevandić, për shkak të refuzimit të tyre për t’iu përgjigjur thirrjes së Prokurorisë së BiH. Pas kësaj, Gjykata e BiH kërkoi nga Interpoli të lëshojë fletarrest ndërkombëtar për Dodikun dhe Stevandićin.
Nga ana tjetër, ministri i Brendshëm i Serbisë Ivica Daçiç deklaroi se Beogradi kishte paraqitur menjëherë ankesë në Interpol për këtë kërkesë, me arsyetimin se Dodik dhe Stevandić janë shtetas të Serbisë. Vendimi nga selia e Interpolit ende pritet.
Sputnjik e ka mohuar se ka publikuar lajmin për shtetësinë e Dodikut, dhe të njëjtën gjë e ka mohuar edhe vetë Dodik.
