Kombëtarja e Rumanisë e ka marrë një lajm tronditës para dy ndeshjeve mjaft të rëndësishme të kualifikimeve për Euro 2024.
Rumunët nuk do të mundë të llogarisin në njërin prej yjeve të ekipit, Razvan Marin, raporton mediumi rumun “Fanatik”.
Futbollisti i Cagliarit, i huazuar në Empoli, u lëndua së fundmi dhe pritet të jetë jashtë fushës së blertë për një muaj e gjysmë.
Kjo nënkupton se trajneri Edi Iordanescu s’do ta ketë në dispozicion mesfushorin e tij për ndeshjet e qershorit kundër Kosovës dhe Zvicrës.
Rumania do të luajë me “Dardanët” më 16 qershor dhe me “Helvetikët” tri ditë më pas, më 19 të muajit tjetër.
Marin i ka zhvilluar 46 ndeshje dhe i ka realizuar dy gola me Kombëtaren e Rumanisë.
Por, 27 vjeçari nuk do të mundë t’i ndihmojë shokët e skuadrës në dy prej ndeshjeve vendimtare në Grupin I për ta, shkruan “Gazeta Express”.
Natyrisht, ky është një lajm i mirë për Kosovën dhe për Zvicrën, të cilat kërkojnë rezultate pozitive ndaj Rumanisë, e cila i prin tabelës së bashku me “Helvetikët” me nga 6 pikë nga po aq të mundshme, ndërsa Kosova i ka grumbulluar dy pikë nga dy ndeshje.
