Shtëpia e Bardhë i ka kërkuar Pentagonit të heqë pezullimin e dërgesave të bombave 900 kilogramëshe për Izraelin, që ishte vendosur nga administrata e Joe Bidenit.
Vendimi i Presidentit Biden për të ndërprerë dërgimin e një sasie bombash prej 900 kilogramësh në majin e kaluar shkaktoi një nga krizat më të mëdha në marrëdhëniet amerikano-izraelite gjatë luftës 15-mujore në Gaza.
Është thënë se 1,800 bomba MK-84, të cilat ndodheshin në magazinë në Shtetet e Bashkuara, do të ngarkohen në anije dhe do të dërgohen në Izrael në ditët e ardhshme.
“Shumë gjëra që Izraeli i kishte porositur dhe paguar, por që Biden nuk i kishte dërguar, tani janë në rrugë,” ka shkruar Presidenti Trump në Truth Social.
Biden kishte vendosur ndalimin e dërgimit të këtyre bombave si shenjë proteste kundër pushtimit të Rafahut nga Izraeli, i cili ishte shndërruar në një simbol politik shumë më tepër sesa një çështje ushtarake-operative. Kryeministri izraelit Benjamin Netanyahu e përdori këtë për të mobilizuar republikanët kundër Bidenit.
Administrata e Bidenit ishte e shqetësuar se përdorimi i bombave prej 900 kilogramësh nga Izraeli në zonat e populluara dendur të Gazës do të shkaktonte viktima të shumta civile.
“E hoqëm atë ndalim sot,” tha Trump për bombat dhe shtoi se ato ishin pritur prej kohësh. Kur u pyet pse hoqi ndalimin e këtyre bombave, Trump u përgjigj: “Sepse ato janë blerë nga izraelitët.”
Trump iu përgjigj pyetjeve të gazetarëve për 20 minuta në bordin e avionit Air Force One të shtunën.
Presidenti Trump tha se do të donte të shihte Jordaninë, Egjiptin dhe vendet e tjera arabe të pranonin më shumë refugjatë palestinezë nga Gaza, në mënyrë që Gaza të pastrohej nga rrënojat.
Lidhur me vizionin e tij më të gjerë për Gazën, Trump tha se ka biseduar me mbretin e Jordanisë Abdullah II dhe se do të flasë me presidentin egjiptian Abdel Fattah el-Sisi.
Trump tha se e ka lavdëruar Jordaninë për pranimin e suksesshëm të refugjatëve palestinezë dhe se i ka thënë mbretit: “Do të doja të pranoje më shumë, sepse për momentin po shoh gjithë Rripin e Gazës dhe ai është një rrëmujë. Është një rrëmujë e vërtetë.”
Ai tha se një zhvendosje masive e palestinezëve “mund të jetë e përkohshme ose afatgjatë,” duke shtuar se zona e Gazës “ka pasur shumë, shumë konflikte” gjatë shekujve.
“Diçka duhet të ndodhë,” tha Trump dhe shtoi: “Por tani për tani është fjalë për fjalë një vend shkatërrimi. Pothuajse gjithçka është shkatërruar dhe njerëzit atje po vdesin.” Ai tha: “Prandaj, do të preferoja të përfshija disa nga vendet arabe dhe të ndërtoja shtëpi në një vend tjetër, ku ndoshta do të mund të jetonin në paqe për një herë të parë.”
Trump në të kaluarën ka shfaqur pikëpamje jo tradicionale për të ardhmen e Gazës. Pas inaugurimit të tij të hënën, ai sugjeroi se Gaza “me të vërtetë duhet të rindërtohet në një mënyrë tjetër.”
Presidenti amerikan shtoi atëherë: “Gaza është interesante. Një vendndodhje fenomenale, pranë detit. Klima më e mirë, e di, gjithçka është e mirë. Mund të bëhen disa gjëra të bukura atje, është shumë interesante.”
