Presidenti i sapozgjedhur i Shteteve të Bashkuara të Amerikës, Donald Trump, mbërriti në zonën e Washington-it të shtunën në mbrëmje për të festuar rikthimin e tij në pushtet, përpara ceremonisë së inaugurimit.
Trump udhëtoi me avionin presidencial të dërguar nga presidenti në largim, Joe Biden, drejt bazës republikane në Palm Beach të Floridës, ku kishte përgatitur tranzicionin e tij pas fitores në zgjedhjet e 5 nëntorit. Bashkë me të në avion ishin gruaja e tij Melania, vajza Ivanka dhe dhëndri Jared Kushner.
Pas mbërritjes në aeroportin Dulles, në periferi të Virginisë, Trump udhëtoi drejt klubit të tij të golfit në Sterling, në rrethinat e Washington-it.
Një imitues i Elvis Presley-it, Leo Days, performoi një serenatë për presidentin e ri dhe zonjën e parë gjatë një pritjeje për rreth 500 të ftuar, që u pasua nga një spektakël madhështor fishekzjarrësh.
Parashikimi i motit të ftohtë për të hënën bëri që Trump të zhvendosë ceremoninë e inaugurimit nga ndërtesa e Capitol-it Amerikan në Rotondën e brendshme të Capitol-it, ndërsa parada përgjatë Pennsylvania Avenue do të mbahet në arenën Capital One.
Në Rotondën e Capitol-it, Trump do të bëjë betimin në orën 12:00. Më pas, ai do të mbajë fjalimin e tij të inaugurimit. Ai ka thënë se tema do të jetë “uniteti dhe forca, si dhe fjala ‘drejtësi'”.
Kjo do të jetë hera e parë që nga inaugurimi i dytë i Ronald Reagan-it në janar 1985 që një ngjarje e madhe inauguruese zhvendoset në një hapësirë të mbyllur.
