Presidenti amerikan Donald Trump ka thënë se vendet “po ia puthin prapanicën” duke u përpjekur të bëjnë marrëveshje me Shtetet e Bashkuara, pasi ai vendosi tarifa gjithëpërfshirëse ndaj partnerëve tregtarë në të gjithë botën, shkruan newsweek.
Duke folur në një darkë të Komitetit Kombëtar Republikan të Kongresit (NRCC) të martën mbrëma, Trump tha se vendet “po vdesin për të bërë një marrëveshje” me SHBA-në, ndërsa ai gjithashtu goditi republikanët që flisnin kundër planeve të tij tarifore, transmeton Telegrafi.
Fjalimi i Trump erdhi kundër një sfondi ekonomik të humbjeve të tregut dhe frikës së një recesioni pas tarifave të tij.
Kina është goditur më së shumti me një tarifë prej 104 për qind për të gjitha importet duke filluar nga e mërkura.
Ajo vjen pasi Kina u zotua të “luftojë deri në fund” në luftën tregtare.
Të martën në mbrëmje, Trump mbrojti tarifat e tij “reciproke” që i prezantoi më 2 prill, duke thënë se SHBA do të bëjë “shumë më mirë” ekonomikisht si rezultat i tyre.
Shtoi se disa vende po duan të negociojnë një marrëveshje me SHBA-në për të shmangur pagesën e tarifave të ashtuquajtura “Dita e Çlirimit”.
Japonia, Koreja e Jugut dhe Italia thuhet se janë ndër vendet e prekura, që tani po përpiqen të arrijnë një marrëveshje të re tregtare me SHBA-në.
Trump goditi gjithashtu një republikan që ka folur kundër planeve të tij tarifore, duke argumentuar se Kongresi “duhet të marrë përsipër negociatat”.
Ndërsa nuk e përmendi ligjvënësit me emër, Trump dukej se po i referohej Senatorit të Kentakit, Rand Paul, i cili ka qenë një nga kritikët më të zëshëm të tarifave të presidentit.
Paul ka argumentuar se Kongresi duhet të ushtrojë fuqinë e tij kushtetuese për të rregulluar tarifat.
Senatori i Ioëa-s, Chuck Grassley, ka prezantuar gjithashtu një projektligj që do të kërkonte që Kongresi të miratojë çdo tarifë të re, e cila ka mbështetjen e disa republikanëve, përfshirë ish-udhëheqësin e Senatit, Mitch McConnell.
Gjatë fjalimit të tij në NRCC, Trump tha se nuk kishte nevojë për “një djalë që të më tregonte se si të negocionte”. /Telegrafi/
