Presidenti amerikan Donald Trump deklaroi të mërkurën se Izraeli do të marrë rolin udhëheqës në një sulm të mundshëm ushtarak ndaj Iranit së bashku me SHBA-në, nëse negociatat e ardhshme për çështjen bërthamore dështojnë.
Ky koment erdhi disa ditë pasi Trump e befasoi kryeministrin izraelit Benjamin Netanyahu, duke shpallur së bashku me të në Shtëpinë e Bardhë se negociatat e drejtpërdrejta ndërmjet SHBA-së dhe Iranit për kufizimin e programit bërthamor të Teheranit do të fillojnë të shtunën – gjë që e befasoi Netanyahun, i cili nuk kishte dijeni për këtë më parë.
I pyetur nga gazetarët në Zyrën Ovale të mërkurën nëse do të përdorte mjete ushtarake kundër Iranit nëse nuk bien dakord për një marrëveshje bërthamore, Trump u përgjigj: “Nëse nevojitet ushtria, do ta përdorim. Izraeli do të jetë padyshim shumë i përfshirë në këtë – do të jetë udhëheqës,” tha ai, në atë që dukej të ishte hera e parë që kërcënonte qartë me një sulm izraelit ndaj Iranit.
Ai tha se SHBA “absolutisht” do të përdorë forcën ushtarake ndaj Iranit nëse është e nevojshme dhe se ka një afat kohor për sa do të zgjasin negociatat, megjithëse nuk e specifikoi. Raportimet thonë se Trump i ka dhënë këtij procesi dy muaj.
Presidenti amerikan tha se samiti i së shtunës në Oman është “fillimi” i procesit. I dërguari i tij për Lindjen e Mesme, Steve Witkoff, pritet ta përfaqësojë SHBA-në, ndërsa Irani do të përfaqësohet nga ministri i jashtëm Abbas Araghchi. Trump tha se bisedimet do të jenë të drejtpërdrejta, ndërsa Irani deklaroi se ato do të zhvillohen përmes ndërmjetësuesve.
I befasuar nga tema
Netanyahu nuk ka arsye të jetë i kënaqur pas takimit me Trumpin: Nuk mori garanci për Iranin
“Nuk kemi shumë kohë sepse nuk do t’u lejojmë të kenë armë bërthamore,” tha Trump. “Do t’i lejojmë të përparojnë. Dua që ata të përparojnë. Dua që Irani të jetë i shkëlqyer. E vetmja gjë që nuk mund të kenë është arma bërthamore. Ata e kuptojnë këtë.”
Witkoff mund të heqë dorë nga udhëtimi në Oman të shtunën nëse Irani refuzon të zhvillojë bisedime të drejtpërdrejta me të në Muskat, raportoi Washington Post.
Zyrtarët amerikanë këmbëngulin që negociatat të jenë të drejtpërdrejta, duke pretenduar se bisedimet e tërthorta nuk janë aq efektive.
“Nuk do të luajmë lojëra budallallëku,” citohet një zyrtar i administratës së Trumpit, duke thënë se ajo që nevojitet për të kapërcyer mosbesimin e thellë nga të dyja palët është “një diskutim i plotë” dhe një takim mendjesh.
Witkoff do të ishte madje i gatshëm të udhëtojë në Teheran nëse ftohet, thanë dy zyrtarë të administratës për Post.
Një nga zyrtarët spekuloi se vendimi i Trumpit për të shpallur të hënën bisedimet me Netanyahun në Zyrën Ovale ishte për të mbajtur kryeministrin nën kontroll dhe për të parandaluar kritikat izraelite.
Trump është më i prirur të merret me diplomaci sesa me bombardime, thanë zyrtarët për Post.
