Presidenti amerikan Donald Trump ka deklaruar se Ukraina “ndoshta një ditë do të bëhet ruse”, ndërkohë që nënpresidenti i tij, JD Vance, po përgatitet për një takim me presidentin ukrainas Volodymyr Zelensky në fund të kësaj jave.
Trump, gjatë një interviste për Fox News të transmetuar të hënën, theksoi përsëri nevojën për t’i dhënë fund luftës në Ukrainë, e cila ka zgjatur pothuajse tre vjet.
“Është e mundur që të arrijnë një marrëveshje, ose ndoshta jo. Ndoshta një ditë do të bëhet ruse, ose ndoshta jo,” tha Trump.
Ai gjithashtu sugjeroi që ndihma amerikane për Ukrainën duhet të sjellë përfitime në këmbim, duke përmendur mundësinë e shkëmbimeve tregtare për burimet natyrore të Ukrainës, përfshirë mineralet e rralla.
“Ne po investojmë shuma të mëdha parash dhe dua që kjo të kthehet mbrapsht. U thashë atyre që dua një ekuivalent, le të themi 500 miliardë dollarë në vlerë të mineraleve të rralla,” tha Trump. “Ata në thelb ranë dakord për këtë, kështu që të paktën nuk ndihemi budallenj.”
Trump konfirmoi se së shpejti do të dërgojë të dërguarin e tij të posaçëm, Keith Kellogg, në Ukrainë për të përgatitur një propozim për ndalimin e luftimeve.
