Presidenti francez Emmanuel Macron tha se synon t’i thotë homologut të tij amerikan, Donald Trump, se është në interesin e përbashkët të amerikanëve dhe evropianëve që të mos jenë “të dobët” përballë liderit rus Vladimir Putin.
Ky deklarim vjen mes negociatave të udhëhequra nga SHBA-të për t’i dhënë fund luftës pothuajse trevjeçare në Ukrainë. Presidenti francez do të udhëtojë të hënën në Uashington për t’u takuar me Trumpin.
Gjatë një sesioni njëorësh pyetje-përgjigje në rrjetet sociale të enjten, Macron tha se do t’i përcjellë Trumpit këtë mesazh:
“Nuk mund të jesh i dobët përballë Putinit. Kjo nuk je ti, nuk është shenja jote dalluese dhe nuk është në interesin tuaj. Si mund të jesh i besueshëm përballë Kinës nëse je i dobët ndaj Putinit?”
Deklaratat e fundit të Trumpit, të cilat pasqyrojnë narrativën e Putinit dhe planet për negociata direkte me Moskën, kanë shqetësuar aleatët evropianë dhe zyrtarët ukrainas.
Megjithatë, Macron sugjeroi se strategjia e Trumpit për të krijuar “pasiguri” në negociatat me Rusinë mund t’i forcojë në fakt aleatët perëndimorë në këto bisedime.
“Putini nuk e di çfarë do të bëjë Trumpi. Ai mendon se Trump është i aftë për çdo gjë. Kjo pasiguri është në favorin tonë dhe të Ukrainës,” theksoi lideri francez.
Ai tha gjithashtu se do të përpiqet ta bindë Trumpin se interesat e amerikanëve dhe evropianëve janë të njëjta dhe do t’i përcjellë këtë mesazh gjatë takimit:
“Nëse i lejon Rusisë të marrë Ukrainën, kjo do të jetë e pandalshme.”
Sipas Macronit, kjo do të thotë se për çdo marrëveshje paqeje duhet të negociohet me ukrainasit dhe evropianët. Ai theksoi gjithashtu se të gjithë duan paqe, por me një paralajmërim të rëndësishëm:
“Por, nuk duam një armëpushim që nënkupton dorëzimin e Ukrainës, sepse kjo është e rrezikshme. Ne e dimë që kjo do ta nxiste Rusinë të vazhdojë më tej. Këtë e kemi përjetuar më parë,” tha presidenti francez.
Agjencia AP raporton gjithashtu se Macron duket i gatshëm t’i përgjigjet thirrjes së Trumpit për të rritur shpenzimet për mbrojtjen.
I pyetur nëse mendon të dërgojë trupa franceze në Ukrainë, ai tha se nuk do të dërgojë ushtarë për të luftuar në Ukrainë, por mund të vendosë trupa si pjesë e forcave të sigurisë që do të ofrojnë “garanci” pas arritjes së një marrëveshjeje paqeje.
“Nuk e përjashtojmë, në bashkëpunim me aleatët tanë, mundësinë për të pasur forca që, pasi të arrihet një marrëveshje paqeje, mund të kontribuojnë në garantimin e sigurisë së Ukrainës,” deklaroi Macron.
