Turqia dëshiron të nënshkruajë një marrëveshje mbrojtjeje me vlerë gjashtë miliardë dollarë me Arabinë Saudite, e cila do të përfshinte shitjen e tankeve, anijeve luftarake dhe raketave, si dhe një partneritet në programin turk të avionëve luftarakë.
Presidenti turk, Recep Tayyip Erdoğan, pritet të vizitojë Arabinë Saudite në mars për të finalizuar këtë marrëveshje, sipas raportimeve të Bloomberg.
Ky pakt konsiderohet si një hap strategjik në përpjekjen e Turqisë për të zgjeruar industrinë e saj të mbrojtjes dhe për të forcuar marrëdhëniet me njërin prej importuesve më të mëdhenj të armëve në botë.
Turqia po përpiqet të zhvillojë industrinë e saj të mbrojtjes dhe e sheh Arabinë Saudite si një treg kyç, duke qenë një nga importuesit më të mëdhenj të armëve në botë.
Këto dy vende nënshkruan një marrëveshje në vitin 2023, sipas së cilës Arabia Saudite do të blejë dronë nga kompania turke Baykar, ndërsa Ankaraja synon të shesë tankun kryesor luftarak të quajtur Altay, së bashku me sisteme mbrojtëse raketash, sipas zyrtarëve.
Ata gjithashtu deklarojnë se Turqia dëshiron që Arabia Saudite të bëhet partnere në programin për zhvillimin e avionit luftarak të njohur si Kaan.
Edhe pse fluturimi i parë provë ndodhi në fillim të vitit 2024, ende pritet që të kalojnë disa vite derisa ky avion të bëhet plotësisht operativ.
